மியான்மரில் 74 பேர் பலியான பரிதாபம்; தென்கிழக்காசியாவை சூறையாடிய யாகி சூறாவளி
யாகி சூறாவளியால் ஏற்பட்ட கடும் வெள்ளம் மற்றும் நிலச்சரிவைத் தொடர்ந்து மியான்மரில் 74 பேர் இறந்துள்ளனர் மற்றும் இன்னும் பலரைக் காணவில்லை என்று அந்நாட்டு ஊடகங்கள் ஞாயிற்றுக்கிழமை (செப்டம்பர் 15) செய்தி வெளியிட்டுள்ளன. இந்த அறிக்கைகளின்படி, உள்நாட்டுப் போரால் பாதிக்கப்பட்டு மக்கள் கடும் துயரில் உள்ள மியான்மரில், அடுத்த இடியாக தாக்கிய யாகி சூறாவளியால் நாடு முழுவதும் 450க்கும் மேற்பட்ட கிராமங்கள் மற்றும் வார்டுகளை வெள்ளம் பாதித்துள்ளது. 74 பேர் இறப்பு உறுதி செய்யப்பட்டுள்ள நிலையில், காணாமல் போன 89 பேரை தேடும் மற்றும் மீட்பு பணிகள் நடைபெற்று வருகின்றன. இந்த பாதிப்பில் சுமார் 65,000 வீடுகள் அழிந்துள்ளன.
ஆசியாவின் இந்த ஆண்டின் சக்திவாய்ந்த சூறாவளி
இந்த ஆண்டு ஆசியாவின் மிக சக்திவாய்ந்த புயல் யாகி, தென்கிழக்காசியா மற்றும் தெற்கு சீனா முழுவதும் பலத்த மழை மற்றும் காற்றுடன் மிகப்பெரிய பாதிப்பை ஏற்படுத்தியுள்ளது. வியட்நாமில் புயல் மற்றும் நிலச்சரிவு மற்றும் திடீர் வெள்ளம் காரணமாக இறந்தவர்களின் எண்ணிக்கை 226 ஆக உயர்ந்துள்ளது என்று அரசாங்கத்தின் பேரிடர் நிறுவனம் வியாழனன்று கூறியதாக ராய்ட்டர்ஸ் செய்தி வெளியிட்டுள்ளது. வெப்பமயமாதல் காரணமாக பெருங்கடலில் உருவாகும் புயல்கள் மிகவும் தீவிரமானதாகவும், ஆபத்தானதாகவும் ஆக்கப்படுகின்றன என விஞ்ஞானிகள் நீண்ட காலமாக எச்சரித்துள்ளனர். மனிதனால் உருவான இந்த காலநிலை நெருக்கடிக்கு வளர்ந்த நாடுகள் அதிக வரலாற்றுப் பொறுப்பை ஏற்கும் அதே வேளையில், வளரும் நாடுகள் மற்றும் சிறிய தீவு நாடுகள் மிக மோசமான தாக்கங்களைச் சந்திக்கின்றன.
