உடனடியாக சந்தைக்கு வரும் டீசல்! அமெரிக்க அதிபர் டிரம்பின் மிரட்டலுக்கு பணிந்ததா ஐரோப்பா? கச்சா எண்ணெய் விலை சரிவு
செய்தி முன்னோட்டம்
அமெரிக்க அதிபர் டொனால்ட் டிரம்ப் வெள்ளிக்கிழமை (அக்டோபர் 2) தனது ட்ரூத் சோஷியல் தளத்தில் வெளியிட்டுள்ள பதிவில், ஐரோப்பிய நாடுகள் தங்களிடம் தேக்கி வைத்துள்ள பெருமளவிலான டீசல் எண்ணெய் கையிருப்பிலிருந்து கணிசமான அளவை சந்தைக்கு வெளியிட உடனடியாக ஒப்புக் கொண்டுள்ளதாக தெரிவித்துள்ளார். இருப்பினும், எந்தெந்த ஐரோப்பிய நாடுகள் இதில் பங்கேற்கின்றன அல்லது எவ்வளவு அளவு டீசல் சந்தைக்கு கொண்டுவரப்படும் என்பது குறித்த கூடுதல் விவரங்களை அவர் வெளியிடவில்லை. கூடுதல் விபரங்கள் இங்கே:-
ஈரான் போர்
ஏற்றுமதி தடை மிரட்டல் மற்றும் ஈரான் போரின் தாக்கம்
மத்திய கிழக்கில் ஈரான் போர் தொடர்ந்து தீவிரமடைந்து வரும் சூழலில், உலகளாவிய எரிபொருள் விநியோக சங்கிலியில் கடுமையான தட்டுப்பாடு ஏற்பட்டுள்ளது.
இதன் காரணமாக இங்கிலாந்து உள்ளிட்ட ஐரோப்பிய நாடுகளில் டீசல் விலை முன்னெப்போதும் இல்லாத வகையில் உச்சத்தை தொட்டது.
அமெரிக்காவில் இடைக்காலத் தேர்தல் நெருங்கி வரும் நிலையில், உள்நாட்டு எரிபொருள் விலையை கட்டுப்படுத்த அமெரிக்காவிலிருந்து ஏற்றுமதி செய்யப்படும் டீசலுக்கு தடை விதிக்கப் போவதாக டிரம்ப் எச்சரித்திருந்தார்.
ஐரோப்பிய நாடுகள் தங்களின் கையிருப்பை பயன்படுத்த வேண்டும் என்ற டிரம்பின் அழுத்தத்தைத் தொடர்ந்தே இந்த அறிவிப்பு வெளியாகியுள்ளது.
விலை சரிவு
சர்வதேச சந்தையில் கச்சா எண்ணெய் விலை அதிரடி சரிவு
டிரம்பின் இந்த அறிவிப்பு வெளியானதைத் தொடர்ந்து, சர்வதேச கச்சா எண்ணெய் சந்தையில் விலைகள் கணிசமாகக் குறைந்தன.
ப்ரென்ட் கச்சா எண்ணெய் விலை பீப்பாய்க்கு $3.06 (3%) குறைந்து $99.25 ஆகவும், அமெரிக்காவின் WTI கச்சா எண்ணெய் விலை $3.95 (4.25%) குறைந்து $88.92 ஆகவும் சரிந்தது.
அதேபோல, ஐரோப்பிய டீசல் விலைக்கான அளவீடான காசோயில் ஃபியூச்சர்ஸ் விலையும் 4.3% குறைந்து மெட்ரிக் டன் $1,386.75 ஆக சரிவடைந்துள்ளது.