செங்கடலைக் கைப்பற்ற சவுதியின் மாபெரும் திட்டம்! ஹூதிகளுக்கு எதிராக 1 லட்சம் படைகளுடன் போருக்கு தயாராவதாக தகவல்
செய்தி முன்னோட்டம்
செங்கடல் மற்றும் சர்வதேசக் கடல் வர்த்தகத்தின் முக்கிய நுழைவாயிலான பாப் எல்-மண்டெப் ஜலசந்தி பகுதியை ஈரான் ஆதரவு பெற்ற ஹூதி கிளர்ச்சியாளர்களிடமிருந்து மீட்க சவுதி அரேபியா திட்டமிட்டுள்ளது. இதற்காக சுமார் 1,00,000 ஏமன் படைகளை உள்ளடக்கிய மாபெரும் ராணுவத் தாக்குதலை நடத்த சவுதி அரேபியத் தலைமை தீவிர ஆலோசனையில் ஈடுபட்டுள்ளது. சர்வதேச அளவில் முக்கியத்துவம் வாய்ந்த இக்கடல் பாதையை ஹூதிகள் கைப்பற்றியதை அடுத்து, அங்குப் போர்ப் பதற்றம் உச்சமடைந்துள்ளது.
முக்கிய வியூகங்கள்
வான்வழித் தாக்குதல் மற்றும் சவூதியின் இரண்டு முக்கிய வியூகங்கள்
சவுதி அரேபியாவின் மேற்பார்வையில் நடைபெறவுள்ள இந்த ராணுவ நடவடிக்கையில், ஏமன் அரசுப் படைகள் தரைவழியாகத் தாக்குதலைத் தொடங்கும்.
அதேவேளையில் சவுதி வான்படை சக்திவாய்ந்த வான்வழித் தாக்குதல்களை நடத்தும்.
இதற்காக பாப் எல்-மண்டெப் பகுதியில் மட்டும் குறிப்பிட்ட தாக்குதலை நடத்துவதா அல்லது அல்-பைதா, மாரிப், தாயிஸ் மற்றும் அல்-ஜவ்ப் ஆகிய பல முனைகளில் ஒரே நேரத்தில் தாக்குதலை நடத்துவதா என இரு வேறு வியூகங்களை சவுதி அதிகாரிகள் பரிசீலித்து வருகின்றனர்.
அமைதிப் பேச்சுவார்த்தை
அமெரிக்க உளவுத்துறை ஆதரவு மற்றும் அமைதிப் பேச்சுவார்த்தை முடிவு
இந்த ராணுவப் போருக்கு அமெரிக்கா முழுமையான உளவுத் தகவல்களை வழங்கி சவுதி அரேபியாவிற்கு ஆதரவு அளித்து வருகிறது.
இதனிடையே, பாப் எல்-மண்டெப் ஜலசந்தி ஹூதிகளின் கட்டுப்பாட்டில் இருக்கும் வரை அவர்களுடன் எந்தவிதமான புதிய அமைதிப் பேச்சுவார்த்தையிலும் ஈடுபட முடியாது என சவுதி அரேபியா திட்டவட்டமாகத் தெரிவித்துவிட்டது.
இருப்பினும், இந்த பிரம்மாண்ட ராணுவ நடவடிக்கை எப்போது தொடங்கும் என்ற துல்லியமான தேதி இதுவரை அதிகாரப்பூர்வமாக அறிவிக்கப்படவில்லை.
தீவிரத் தாக்குதல்
தாயிஸ் பகுதியில் தொடங்கும் தீவிரத் தாக்குதல்கள்
இந்த போர்த் திட்டத்தின் ஒரு பகுதியாக, ஏமன் அரசுப் படைகள் ஏற்கனவே தாயிஸ் பகுதியில் உள்ள ஹூதி இலக்குகள் மீது வான்வழித் தாக்குதல்களைத் தொடங்கியுள்ளன.
வெள்ளிக்கிழமை மட்டும் மூன்று மணி நேரத்திற்குள் 20-க்கும் மேற்பட்ட வான்வழித் தாக்குதல்கள் நடத்தப்பட்டதாக ஏமன் ராணுவ செய்தித் தொடர்பாளர் தெரிவித்துள்ளார்.
ஹூதிகளின் கடற்கரை ஆதிக்கத்தை முறியடித்து, சர்வதேசக் கப்பல் போக்குவரத்தை பாதுகாப்பதே இத்தாக்குதலின் முதன்மை நோக்கமாகும்.