'அப்பாவி குழந்தைகளின் மரணம் மிகவும் வேதனை அளிக்கிறது': உக்ரைன் போரை நிறுத்த கோரினார் பிரதமர் மோடி
போரில் அப்பாவி குழந்தைகள் உயிரிழப்பது இதயத்தை உலுக்குவதாகவும், மிகுந்த வேதனை அளிப்பதாகவும் உள்ளது என்று பிரதமர் நரேந்திர மோடி ரஷ்ய அதிபர் விளாடிமிர் புதினிடம் தெரிவித்துள்ளார். "போரோ, மோதல்களோ, பயங்கரவாத தாக்குதல்களோ எதுவாக இருந்தாலும், மனிதநேயத்தின் மீது நம்பிக்கை கொண்ட ஒவ்வொருவரும் உயிர் பலி ஏற்படும் போது வேதனை அடைகிறார்கள். ஆனால், அப்பாவி குழந்தைகள் கொல்லப்படும்போது, அப்பாவி குழந்தைகள் இறப்பதைப் பார்க்கும்போது, மனதைக் கனக்கச் செய்கிறது, அந்த வலி மிக பெரியது. இதுபற்றி நான் ஏற்கனவே உங்களுடன் விவாதித்திருக்கிறேன்,'' என்று பிரதமர் மோடி கூறியுள்ளார்.
அமைதியை மீட்டெடுக்க இந்தியா உறுதுணையாக இருக்கும்: பிரதமர் மோடி
நேற்று உக்ரைனில் உள்ள முக்கிய குழந்தைகள் மருத்துவமனையை ரஷ்யா ஏவுகணைகளால் தாக்கியதாகவும், நாடு முழுவதும் உள்ள மற்ற நகரங்கள் மீது ஏவுகணை மழை பொழிந்ததாகவும் உக்ரைன் தெரிவித்துள்ளது. இதனால், 41 குழந்தைகள் உயிரிழந்ததாகவும் தெரிவிக்கப்பட்டுள்ளது. இந்நிலையில், இது குறித்து ரஷ்ய அதிபரிடம் பேசிய பிரதமர் மோடி, "உக்ரைனில் நடந்த போரைப் பற்றி திறந்த மனதுடன் விவாதிக்க முடிந்ததில் நான் மகிழ்ச்சியடைகிறேன். மேலும் போரைப் பற்றிய கருத்துக்களை நாங்கள் மிகவும் மரியாதையுடன் பகிர்ந்துகொண்டோம்" என்று இன்று மாஸ்கோவில் புதினுடனான இருதரப்பு பேச்சுவார்த்தையின் போது மோடி கூறினார். நாட்டில் அமைதியை மீட்டெடுப்பதற்கு "எல்லா வழிகளிலும்" ஒத்துழைக்க இந்தியா தயாராக உள்ளது என்று பிரதமர் மேலும் புதினிடம் கூறினார்.
