இஸ்ரேல்-ஈரான் மோதலால் பதற்றம் அதிகரிப்பு; பிரதமர் மோடிக்கு போன் போட்டு விளக்கம் அளித்த பெஞ்சமின் நெதன்யாகு
செய்தி முன்னோட்டம்
இஸ்ரேல் மற்றும் ஈரான் இடையே அதிகரித்து வரும் பதற்றத்திற்கு மத்தியில், இந்தியப் பிரதமர் நரேந்திர மோடியிடம் இஸ்ரேல் பிரதமர் பெஞ்சமின் நெதன்யாகு தொலைபேசியில் அழைத்து விளக்கம் அளித்துள்ளார். எக்ஸ் தளத்தில் இதை உறுதிப்படுத்தி உள்ள இந்திய பிரதமர் மோடி, வளர்ந்து வரும் நிலைமை குறித்து தனக்கு விளக்கப்பட்டதாகவும், இந்தியாவின் கவலையை வெளிப்படுத்தியதாகவும், பிராந்தியத்தில் அமைதி மற்றும் ஸ்திரத்தன்மையை மீட்டெடுக்க வேண்டிய அவசரத் தேவையை வலியுறுத்தியதாகவும் கூறினார். ஈரானின் அணுசக்தி உள்கட்டமைப்பு, ஏவுகணை அமைப்புகள் மற்றும் ராணுவத் தலைமையின் முக்கிய கூறுகளை குறிவைத்து இஸ்ரேல் வெள்ளிக்கிழமை (ஜூன் 13) ஆபரேஷன் ரைசிங் லயன் தொடங்கப்பட்டதைத் தொடர்ந்து இந்த அழைப்பு வந்தது.
வெற்றிகரமான தாக்குதல்
மிகவும் வெற்றிகரமான தாக்குதல் என வர்ணித்த பெஞ்சமின் நெதன்யாகு
இஸ்ரேலிய பிரதமர் நெதன்யாகு இந்த தாக்குதலை மிகவும் வெற்றிகரமான தொடக்கத் தாக்குதல் என்று பாராட்டினார். இந்த நடவடிக்கையில் ஈரானின் ஜெனரல்கள் அமீர் அலி ஹாஜிசாதே, முகமது பகேரி, ஹொசைன் சலாமி மற்றும் கோலம் அலி ரஷீத் உட்பட பல உயர்மட்ட ஈரானிய ராணுவ பிரமுகர்கள் கொல்லப்பட்டதாக கூறப்படுகிறது. கூடுதலாக, முன்னாள் அணுசக்தி அமைப்பின் தலைவர் ஃபெரேடவுன் அப்பாசி உட்பட ஈரானின் ஆறு அணு விஞ்ஞானிகள் உயிரிழந்தவர்களில் அடங்குவர். ஈரான் கடுமையான எச்சரிக்கை விடுத்து, பதிலடி வரம்பற்றதாக இருக்கும் என அறிவித்துள்ளது. ஈரானின் ஆயுதப்படைகள் இந்தத் தாக்குதல்கள் அனைத்து சிவப்புக் கோடுகளையும் தாண்டியதாக விவரித்தன.
தண்டனை
இஸ்ரேலுக்கு கடுமையான தண்டனை வழங்க ஈரான் சபதம்
ஈரானின் உச்ச தலைவர் அயதுல்லா அலி கமேனி இஸ்ரேலுக்கு கடுமையான தண்டனை வழங்குவதாக சபதம் செய்தார். ஈரான் தனது எச்சரிக்கையில் அமெரிக்காவையும் சேர்த்து, அந்த நாட்டிற்கும் கடுமையான விளைவுகள் ஏற்படும் என்று அச்சுறுத்தியது. இதற்கிடையே, அமெரிக்க ஜனாதிபதி டொனால்ட் டிரம்ப், ஈரான் அணுசக்தி ஒப்பந்தத்தில் மீண்டும் இணைய வேண்டும் என்று அழைப்பு விடுத்தார். விரோதங்கள் தொடர்ந்தால் அதிக அழிவுகரமான விளைவுகள் ஏற்படும் என்று எச்சரித்தார்.