இந்தியா-பாகிஸ்தான் இடையே அதிகரிக்கும் பதற்றம்: இன்று கூடுகிறது ஐ.நா. பாதுகாப்பு கவுன்சில் கூட்டம்
செய்தி முன்னோட்டம்
ஜம்மு காஷ்மீரில் நடைபெற்ற பயங்கரவாத தாக்குதல் மற்றும் இந்திய அரசின் கடுமையான பதிலடி நடவடிக்கைகளை அடுத்து, ஐக்கிய நாடுகள் பாதுகாப்பு கவுன்சில் (UNSC) கூட்டம் இன்று நடைபெறுகிறது. இதில், இந்தியா-பாகிஸ்தான் இடையிலான சமீபத்திய பதற்றமான நிலைமையை குறித்து விவாதிக்கப்படும் என தெரிகிறது. பாகிஸ்தான் ஆதரவு கொண்ட பயங்கரவாதிகள் ஜம்மு காஷ்மீரின் பஹல்காம் பகுதியில் நடத்திய தாக்குதலில் 26 சுற்றுலாப் பயணிகள் கொல்லப்பட்ட சம்பவம் உலகளாவிய அதிர்ச்சியை ஏற்படுத்தியுள்ளது. இதைத் தொடர்ந்து, இந்தியா பாகிஸ்தானுடனான பல ஒப்பந்தங்களை துண்டித்து, கடுமையான எதிர்மறை நடவடிக்கைகளை எடுத்து வருகிறது.
ஐ.நா. கூட்டம்
ஐ.நா. கூட்டம் - முக்கிய அம்சங்கள்
இந்தியாவும், பாகிஸ்தானும் தங்களது நிலைப்பாடுகளை வலியுறுத்தவுள்ளன. குறிப்பாக பாகிஸ்தான், இந்திய நடவடிக்கைகளை எதிர்த்து புகாரளிக்க திட்டமிட்டுள்ளது. இதில் சிந்துநதி ஒப்பந்த ரத்து மற்றும் விலக்குகள் குறித்தும் விவாதம் வரலாம் என தகவல் வெளியாகியுள்ளது. இது குறித்து பாதுகாப்பு கவுன்சிலின் மே மாதத் தலைவர் எவாஞ்சலோஸ் செகெரிஸ் கூறுகையில், "அனைத்து கோணங்களிலும் பயங்கரவாதத்திற்கு எதிராக நாங்கள் உறுதியாக இருக்கிறோம். ஆனால், அதிகரித்து வரும் இருநாட்டு பதற்றம் கவலையை ஏற்படுத்துகிறது," என்றார். இந்த சூழ்நிலையை சமாளிக்க, பல நாடுகள் இருபுறத்தையும் அமைதி பேச்சுவார்த்தைக்குத் தூண்டி வருகின்றன. ஆனால் இந்தியாவின் வலுவான நிலை மற்றும் பாகிஸ்தானின் மறுப்பு கோணங்கள், இக்கூட்டத்திற்கும் அதன் முடிவுகளுக்கும் முக்கியத்துவம் தருகிறது.