போராட்டம் நடத்தலாம், நகரத்தைக் கொளுத்தக் கூடாது! இத்தாலி மிலன் நகரில் வெடித்த கலவரம்; மெலோனி அதிரடி
செய்தி முன்னோட்டம்
இத்தாலியின் மிலன் நகரில் போர்களுக்கு எதிராகவும், அதிகரித்து வரும் வாழ்க்கை செலவு மற்றும் விலைவாசி உயர்வுக்கு எதிராகவும் சனிக்கிழமை (அக்டோபர் 17) மிகப்பெரிய பேரணி நடைபெற்றது. அமைதியான முறையில் தொடங்கிய இந்த பேரணியில் திடீரென வன்முறை வெடித்தது. முகமூடி அணிந்த வன்முறையாளர்கள் சிலர் காவல் துறையினர் மீது கற்கள், நடைபாதை கற்கள் மற்றும் பிற பொருட்களை வீசித் தாக்குதல் நடத்தினர். மேலும் அங்கிருந்த உணவக மேஜைகளைக் கொண்டு தடுப்புகளை அமைத்துத் தீவைத்துக் கொளுத்தினர்.
கைது
50 பேர் கைது மற்றும் காவல்துறையினர் படுகாயம்
வன்முறை தீவிரமடைந்ததை அடுத்து, மிலனின் புகழ்பெற்ற பியாசா டெல் டுயோமோ சதுக்கம் மற்றும் சொகுசு வணிக வளாகப் பகுதிகள் உடனடியாகக் காலியாக்கப்பட்டன.
கூட்டத்தைக் கலைக்க காவல்துறையினர் தண்ணீரைப் பீய்ச்சியடித்தும், கண்ணீர் புகைக் குண்டுகளை வீசியும் நடவடிக்கை எடுத்தனர்.
இந்த சம்பவத்தில் இரண்டு காவலர்கள் படுகாயமடைந்தனர். அத்துடன் வன்முறையில் ஈடுபட்ட சிறுவர்கள் உட்பட 50-க்கும் மேற்பட்ட போராட்டக்காரர்களைப் பாதுகாப்புப் படையினர் கைது செய்து காவலில் எடுத்துள்ளனர்.
வன்முறையால் மிலன் நகரின் மையப்பகுதி கடுமையாகப் பாதிக்கப்பட்டிருந்தது.
பிரதமர் கண்டனம்
பிரதமர் ஜியோர்ஜியா மெலோனி கடுமையான கண்டனம்
இந்த சம்பவம் குறித்து சமூக வலைதளத்தில் பதிவிட்ட இத்தாலி பிரதமர் ஜியோர்ஜியா மெலோனி, வன்முறையைக் கடுமையாகக் கண்டித்துள்ளார்.
"அமைதியான முறையில் போராட்டம் நடத்திய ஆயிரக்கணக்கான மக்களுக்கு நான் மதிப்பளிக்கிறேன்.
ஜனநாயகத்தில் போராட்டம் நடத்துவது அனைவரின் உரிமை. ஆனால் நமது நகரங்களைத் தீக்கிரையாக்குவது உரிமையல்ல" என்று அவர் குறிப்பிட்டுள்ளார்.
மேலும் வன்முறையை கண்டிப்பதில் எதிர்க்கட்சிகள் தெளிவான நிலைப்பாட்டை எடுக்க வேண்டும் என்றும், இத்தகைய செயல்களை சகித்துக் கொள்ள முடியாது என்றும் அவர் வலியுறுத்தினார்.
ஐரோப்பிய பின்னணி
மிலன் மேயர் விளக்கம் மற்றும் ஐரோப்பியப் பின்னணி
மிலன் நகரின் மேயர் ஜூசெப்பே சாலா கூறுகையில், மக்கள் பேரணி நடத்தியதற்கான காரணங்களைப் புரிந்து கொள்ள முடிகிறது எனக் குறிப்பிட்டார்.
இருப்பினும் சட்டம் ஒழுங்கு அதிகாரிகளுக்கு எதிரான வன்முறையையும், நகரத்திற்கு ஏற்படுத்தப்பட்ட பெரும் சேதங்களையும் எந்த வகையிலும் நியாயப்படுத்த முடியாது என்று அவர் திட்டவட்டமாகக் கூறினார்.
பக்கத்து நாடான பிரான்சிலும் இதேபோன்று வாழ்க்கை செலவு உயர்வுக்கு எதிராகப் பிரம்மாண்ட போராட்டங்கள் நடைபெற்று வரும் நிலையில், இத்தாலியிலும் இத்தகைய வன்முறைகள் வெடித்துள்ளது குறிப்பிடத்தக்கது.