லிட்டருக்கு 29 கிமீ மைலேஜ்! இந்தியாவில் அறிமுகமானது புதிய ரெனால்ட் டஸ்டர் ஹைபிரிட் கார்
செய்தி முன்னோட்டம்
பிரபல கார் உற்பத்தி நிறுவனமான ரெனால்ட் இந்தியாவில் தனது புதிய டஸ்டர் ஸ்டிராங் ஹைபிரிட் E-Tech 160 காரை அதிகாரப்பூர்வமாக அறிமுகப்படுத்தியுள்ளது. இந்த காரின் ஆரம்ப விலை ₹16.99 லட்சம் (எக்ஸ்-ஷோரூம்) என்றும், உயர்தர மாடலின் விலை ₹19.49 லட்சம் என்றும் நிர்ணயிக்கப்பட்டுள்ளது. எவொல்யூஷன், டெக்னோ மற்றும் எமோஷன் ஆகிய மூன்று பதிப்புகளில் இந்த சொகுசு எஸ்யூவி கார் இந்திய சந்தைக்கு விற்பனைக்கு வந்துள்ளது. நடுத்தர அளவிலான எஸ்யூவி கார் பிரிவில் இந்த புதிய மாடல் வாடிக்கையாளர்களை பெருமளவில் கவரும் என எதிர்பார்க்கப்படுகிறது.
அதிக மைலேஜ்
29 கிமீ மைலேஜ் மற்றும் டிரைவிங் ரேஞ்ச்
புதிய டஸ்டர் ஹைபிரிட் கார் லிட்டருக்கு 29 கிமீ மைலேஜ் தரும் என ARAI அமைப்பு சான்றளித்துள்ளது.
முழுமையாக ஒருமுறை எரிபொருள் நிரப்பினால் 1,400 கிமீ தூரம் வரை தொடர்ந்து பயணிக்க முடியும்.
நகர்ப்புறங்களில் மேற்கொள்ளும் பயணங்களில் 80 சதவீதம் வரை மின்சார ஆற்றலிலேயே இக்காரை இயக்க முடியும். பேட்டரி இயங்கும் போதே தானாகவே சார்ஜ் ஆகிக்கொள்ளும் வசதி இதில் உள்ளது.
இதனால் வெளிப்புற சார்ஜிங் மையங்களைத் தேடி செல்ல வேண்டிய அவசியம் வாடிக்கையாளர்களுக்கு இல்லை.
ஃபார்முலா 1 தொழில்நுட்பம்
சக்திவாய்ந்த என்ஜின் மற்றும் ஃபார்முலா 1 தொழில்நுட்பம்
இந்த காரில் 1.8 லிட்டர் பெட்ரோல் என்ஜின் மற்றும் இரண்டு மின்சார மோட்டார்கள் சேர்க்கப்பட்டு 160PS பவர் திறன் உருவாக்கப்படுகிறது.
ஃபார்முலா 1 பந்தயக் கார்களின் தொழில்நுட்பத்தால் ஈர்க்கப்பட்ட மல்டி-மோட் ஆட்டோமேட்டிக் கியர்பாக்ஸ் இதில் பொருத்தப்பட்டுள்ளது.
வெறும் 9.6 வினாடிகளில் பூஜ்ஜியத்திலிருந்து 100 கிமீ வேகத்தை இந்த கார் எட்டிவிடும்.
மேலும் கரடுமுரடான பாதைகளை எளிதாகக் கடக்க 212 மிமீ கிரவுண்ட் கிளீரன்ஸ் வசதியும் இதில் கொடுக்கப்பட்டுள்ளது.
இந்த தொழில்நுட்பங்கள் காரின் செயல்திறனை மேலும் உயர்த்துகின்றன.
போட்டி
நவீன உட்புற வசதிகள் மற்றும் போட்டியாளர்கள்
காரின் உட்புறத்தில் காற்றோட்ட வசதி கொண்ட முன்புற இருக்கைகள், பிரீமியம் லெதர் உறை மற்றும் அதிநவீன தொடுதிரை அம்சங்கள் இடம்பெற்றுள்ளன.
பாதுகாப்பிற்காக 1.4kWh லித்தியம்-அயன் பேட்டரிக்கு 8 ஆண்டுகள் அல்லது 1,60,000 கிமீ வாரண்டி வழங்கப்படுகிறது.
இந்திய சந்தையில் இப்புதிய டஸ்டர் ஹைபிரிட் கார், மாருதி சுஸூகி கிராண்ட் விட்டாரா மற்றும் டொயோட்டா அர்பன் க்ரூஸர் ஹைரைடர் ஆகிய கார்களுக்குக் கடுமையான போட்டியாக அமையும்.
டீசல் கார்களுக்கு சிறந்த மாற்றாக இந்த கார் சந்தையில் விளங்கும்.