காசா நகரைக் கைப்பற்றும் இஸ்ரேலின் திட்டத்திற்கு அந்நாட்டின் அமைச்சரவை ஒப்புதல்
செய்தி முன்னோட்டம்
இஸ்ரேலின் பாதுகாப்பு அமைச்சரவை வெள்ளிக்கிழமை பிரதமர் பெஞ்சமின் நெதன்யாகுவின் காசா நகரத்தைக் கைப்பற்றும் திட்டத்திற்கு ஒப்புதல் அளித்ததுள்ளது. இது ஹமாஸுடனான கிட்டத்தட்ட இரண்டு ஆண்டுகால மோதலில் மற்றொரு தீவிரத்தை குறிக்கிறது. இஸ்ரேலின் நடவடிக்கையில் ஏற்கனவே ஆயிரக்கணக்கான பாலஸ்தீனியர்கள் உயிரழந்த நிலையில், காசாவின் பெரும்பகுதி இடிபாடுகளாக மாற்றியுள்ள நிலையில், இஸ்ரேலின் இந்த ஒப்புதல் போரில் மேலும் உயிரிழப்புகள் ஏற்படும் என்ற அச்சத்தை எழுப்பியுள்ளது. "காசா நகரத்தின் கட்டுப்பாட்டை இஸ்ரேல் பாதுகாப்புப் படைகள் (IDF) கைப்பற்றத் தயாராகும், அதே நேரத்தில் போர் மண்டலங்களுக்கு வெளியே உள்ள பொதுமக்களுக்கு மனிதாபிமான உதவிகளை வழங்கும்" என்று நெதன்யாகுவின் அலுவலகம் வெளியிட்ட அறிக்கையில் தெரிவிக்கப்பட்டுள்ளது.
போர் திட்டம்
காசாவை கைப்பற்ற இஸ்ரேலின் போர் திட்டம்
ஹமாஸை நிராயுதபாணியாக்குதல், அனைத்து பணயக்கைதிகளையும் திருப்பி அனுப்புதல், இராணுவமயமாக்கல், காசா பகுதியின் மீது இஸ்ரேலிய கட்டுப்பாடு மற்றும் மாற்று சிவில் அரசாங்கத்தை உருவாக்குதல் உள்ளிட்ட போரை முடிவுக்குக் கொண்டுவருவதற்கான நெதன்யாகுவின் "ஐந்து கொள்கைகளை" பாதுகாப்பு அமைச்சரவை அங்கீகரித்துள்ளது. ஃபாக்ஸ் நியூஸுக்கு அளித்த முந்தைய நேர்காணலில் நெதன்யாகு அத்தகைய நடவடிக்கை குறித்து சூசகமாக தெரிவித்திருந்தார். இருப்பினும், இஸ்ரேல் அந்தப் பகுதியை அரபுப் படைகளிடம் ஆட்சிக்காக ஒப்படைக்க விரும்புவதாக அவர் வலியுறுத்தினார். "நாங்கள் எங்களை விடுவித்துக் கொள்ளவும், காசா மக்களை ஹமாஸின் பயங்கரமான பயங்கரவாதத்திலிருந்து விடுவிக்கவும் விரும்புகிறோம்... நாங்கள் அதை வைத்திருக்க விரும்பவில்லை. எங்களுக்கு ஒரு பாதுகாப்பு சுற்றளவு இருக்க விரும்புகிறோம். அதை நாங்கள் நிர்வகிக்க விரும்பவில்லை" என்று இஸ்ரேலிய பிரதமர் கூறினார்.
ஹமாஸ்
ஹமாஸ் எதிர்வினை
அக்டோபர் 7 ஆம் தேதி ஹமாஸ் நடத்திய தாக்குதலின் போது அவர்களால் பிடிக்கப்பட்ட மீதமுள்ள பணயக்கைதிகளின் குடும்பங்கள், அத்தகைய நடவடிக்கை தங்கள் அன்புக்குரியவர்களின் உயிருக்கு ஆபத்தை விளைவிக்கும் என்று கூறியுள்ளனர். மேலும், அத்தகைய தாக்குதல் இராணுவத்தை மேலும் சோர்வடையச் செய்யும் என்றும் இஸ்ரேலிய இராணுவம் கூறியது. போரின் ஆரம்ப கட்டங்களில் ஆயிரக்கணக்கான பாலஸ்தீனியர்கள் காசா நகரத்தை விட்டு வெளியேறிய போதிலும், இந்த ஆண்டு தொடக்கத்தில் ஒரு சுருக்கமான போர்நிறுத்த ஒப்பந்தம் எட்டப்பட்டபோது பலர் திரும்பினர். காசா நகரத்தின் மீது இஸ்ரேல் பலமுறை குண்டுவீச்சு நடத்தியிருந்தாலும், அங்கு மீண்டும் ஒரு தரைவழி நடவடிக்கை மேற்கொள்ளப்பட்டால் பல்லாயிரக்கணக்கான மக்கள் இடம்பெயர்ந்து செல்ல நேரிடும். இது காசாவில் மனிதாபிமான நெருக்கடியை அதிகரிக்கும்.