இஸ்ரேலில் புதிய வகை கொரோனா கண்டுபிடிப்பு
அடையாளம் தெரியாத புதிய வகை கொரோனாவை கண்டறிந்திருப்பதாக இஸ்ரேலின் சுகாதார அமைச்சகம் தெரிவித்திருக்கிறது. இந்த கொரோனா வகை BA.1 (Omicron) மற்றும் BA.2 வகைகளின் கலவையாக இருக்கலாம் என்று கணிக்கப்பட்டுள்ளது. பென்-குரியன் சர்வதேச விமான நிலையத்தில் தரையிறங்கிய பயணிகளுக்கு RT-PCR சோதனை செய்த போது இந்த புதிய வகை கண்டறியப்பட்டது. பாதிக்கப்பட்ட நோயாளிகளுக்கு காய்ச்சல், தலைவலி மற்றும் தசைவலி போன்ற அறிகுறிகள் இருந்ததாக மருத்துவர்கள் கூறியுள்ளனர். இது போன்ற புதிய வகைகள் உருவாகுவது இயல்பு தான் என்று நிபுணர்கள் தெரிவித்துள்ளனர். இரண்டு வகையான வைரஸ்கள் அருகருகே இருக்கும் போது இந்த மாற்றம் நிகழ்கிறது. இரண்டு வைரஸ்களும் பெருகி மரபணுப் பொருட்களைப் பரிமாறி கொள்கிறது, அதனால் புதிய வகை வைரஸ் உருவாகிறது.
அதிகரித்து வரும் BA.2 வகை நோய்த்தொற்றுகள்
இஸ்ரேலில் ஓமிகிரான் பாதிப்புகள் குறைந்து வந்தாலும், BA.2 வகை நோய்த்தொற்றுகள் தொடர்ந்து அதிகரித்து வரும் நிலையில், இந்த புதிய வகை கொரோனா கண்டுபிடிக்கப்பட்டுள்ளது. கொரோனா பாதிப்புகள் அதிகரித்து வரும் நிலையில் இஸ்ரேலின் பிரதமர் நஃப்தலி பென்னட் அந்நாட்டின் சுகாதார அமைச்சர் நிட்சான் ஹொரோவிட்ஸை சந்தித்துள்ளார். அதன்பிறகு, நாட்டு மக்கள் கண்டிப்பாக 3 தடுப்பூசிகள் போட வேண்டும் என்றும் கொரோனா வழிகாட்டு நெறிமுறைகளை பின்பற்ற வேண்டும் என்றும் அறிவுறுத்தப்பட்டது. இந்த வாரம் இஸ்ரேலில் 6,310 பேர் கொரோனா நோயால் பாதிக்கப்பட்டுள்ளனர். அதில் 335 நோயாளிகள் மோசமான நிலையில் உள்ளனர். 151 பேர் சுவாசக் கருவி பொருத்தப்பட்டு கண்காணிக்கப்பட்டு வருகின்றனர்.
