உயிருடன் இருக்கிறாரா முஜ்தபா கமேனி? மருத்துவமனையில் அனுமதி என தகவல்; ஈரான் வெளியிட்ட ரகசிய வீடியோ
செய்தி முன்னோட்டம்
ஈரானின் உச்ச தலைவர் முஜ்தபா கமேனியின் உடல்நிலை குறித்து சர்வதேச அளவில் பல்வேறு சந்தேகங்களும் வதந்திகளும் பரவி வரும் சூழலில், ஈரானின் அரசு சார்பு செய்தி நிறுவனமான மெஹ்ர், அவரது 12 வினாடிகள் கொண்ட புதிய வீடியோ ஒன்றை வெளியிட்டுள்ளது. அந்த வீடியோவில் முஜ்தபா கமேனி தனது ஆலோசகர்கள் மற்றும் உயர் அதிகாரிகளுடன் அமர்ந்து நாட்டின் பாதுகாப்பு மற்றும் உத்திகள் குறித்து தீவிரமாக ஆலோசிப்பது போன்ற காட்சிகள் இடம்பெற்றுள்ளன. எனினும், இந்த வீடியோ எப்போது, எங்குப் படமாக்கப்பட்டது என்பது குறித்த தெளிவான விவரங்களை அந்த நிறுவனம் வெளியிடவில்லை.
இஸ்ரேலிய அச்சுறுத்தல்
இஸ்ரேலிய ஊடகங்களின் அச்சுறுத்தும் செய்திகளும் மருத்துவமனை தகவலும்
முஜ்தபா கமேனியின் உடல்நிலை மிகக் கடுமையான பாதிப்பிற்குள்ளாகி, அவர் அவசரப் பிரிவில் அனுமதிக்கப்பட்டுள்ளதாக இஸ்ரேலிய ஊடகங்கள் தொடர்ச்சியாக செய்திகளை வெளியிட்டு வந்தன.
குறிப்பாக, 'ஜெருசலேம் போஸ்ட்' நாளிதழ் வெளியிட்ட அறிக்கையில், அவர் இன்னும் சில தினங்களில் உயிரிழக்கக் கூடும் என்றும், அவரது தியாகச் செய்தி வெளியானால் வியப்பதற்கில்லை என்றும் குறிப்பிட்டிருந்தது.
அமெரிக்க-ஈரான் போர் தீவிரமடைந்த நிலையில், முஜ்தபா கமேனி இதுவரை ஒருமுறை கூட நேரடியாக மக்கள் முன் தோன்றவில்லை என்பது குறிப்பிடத்தக்கது.
தொடரும் மர்மம்
ஈரானிய அதிபரின் பேட்டியும் தொடரும் மர்மமும்
ஈரான் அதிபர் மசூத் பெசெஷ்கியான் சமீபத்தில் அளித்த பேட்டியில், உச்ச தலைவரை நேரடியாகத் தொடர்புகொள்வது தற்போது மிகவும் கடினமாக உள்ளதாக ஒப்புக் கொண்டிருந்தார்.
மேலும், 'ஈரான் இன்டர்நேஷனல்' ஊடகம் வெளியிட்ட தகவலின்படி, அதிபர் பெசெஷ்கியான் இருண்ட கண்ணாடி பொருத்திய காரில் முஜ்தபா கமேனியை நேரில் சந்திக்க சென்றதாகவும், ஆனால் அவரது முகத்தைக் கூடப் பார்க்க முடியாத வகையில் ரகசியமான முறையில் அந்த சந்திப்பு அமைந்ததாகவும் கூறப்பட்டது.
இதனால் அவர் உண்மையில் உயிரோடு இருக்கிறாரா என்பதில் தொடர்ந்து சந்தேகம் நீடிக்கிறது.
பொறுப்பு
தந்தை மறைவுக்குப் பின் பொறுப்பேற்ற முஜ்தபா கமேனி
கடந்த பிப்ரவரி 28 அன்று நடைபெற்ற அமெரிக்க-இஸ்ரேல் கூட்டுத் தாக்குதலில் முந்தைய உச்ச தலைவரான ஆயத்துல்லா அலி கமேனி கொல்லப்பட்டதைத் தொடர்ந்து, அவரது மகன் முஜ்தபா கமேனி ஈரானின் புதிய உச்ச தலைவராகப் பொறுப்பேற்றார்.
தந்தையின் இறுதிச்சடங்கில் கூட அவர் நேரில் பங்கேற்காதது பல்வேறு சர்வதேச உளவு அமைப்புகளின் கவனத்தை ஈர்த்தது.
தற்போது ஈரான் அரசு வெளியிட்டுள்ள இந்த வீடியோ, மேற்கத்திய மற்றும் இஸ்ரேலிய ஊடகங்களின் வதந்திகளுக்கு முற்றுப்புள்ளி வைக்கத் திட்டமிட்டு வெளியிடப்பட்டதாகப் பார்க்கப்படுகிறது.