போரை நிறுத்த இதுதான் ஒரே வழி; ஈரான் முன்வைக்கும் மூன்று நிபந்தனைகளின் விவரம்
செய்தி முன்னோட்டம்
அமெரிக்கா மற்றும் இஸ்ரேல் உடனான மோதல் உச்சகட்டத்தை எட்டியுள்ள நிலையில், போரை முடிவுக்குக் கொண்டு வருவதற்கான மூன்று நிபந்தனைகளை ஈரான் அதிபர் மசூத் பெசெஷ்கியான் அறிவித்துள்ளார். சமூக வலைதளமான எக்ஸ் தளத்தில் அவர் வெளியிட்டுள்ள பதிவில், அமைதியை நிலைநாட்ட ஈரான் தயாராக இருப்பதாகவும், ஆனால் அதற்கு சர்வதேச சமூகம் பின்வரும் முக்கியக் கோரிக்கைகளை நிறைவேற்ற வேண்டும் என்றும் வலியுறுத்தியுள்ளார். உரிமைகளை அங்கீகரித்தல்: ஈரானின் "சட்டபூர்வமான உரிமைகளை" சர்வதேச நாடுகள் அங்கீகரிக்க வேண்டும். இழப்பீடு வழங்குதல்: போரினால் ஈரானுக்கு ஏற்பட்டுள்ள சேதங்களுக்கு உரிய இழப்பீடு வழங்கப்பட வேண்டும். சர்வதேச உத்தரவாதம்: எதிர்காலத்தில் ஈரான் மீது மீண்டும் தாக்குதல் நடத்தப்படாது என்பதற்கு வலுவான சர்வதேச உத்தரவாதம் அளிக்கப்பட வேண்டும்.
எச்சரிக்கை
ஈரானின் எண்ணெய் மற்றும் துறைமுக எச்சரிக்கை
ஈரானின் ஆயுதப் படைகளின் செய்தித் தொடர்பாளர் அபுல்ஃபசல் ஷெகார்ச்சி, அமெரிக்காவுக்குக் கடுமையான எச்சரிக்கை விடுத்துள்ளார். "அமெரிக்கா எங்களது துறைமுகங்களைத் தாக்கினால், பாரசீக வளைகுடாவில் உள்ள எந்தவொரு துறைமுகமும், பொருளாதார மையமும் ஈரானின் தாக்குதலில் இருந்து தப்பிக்க முடியாது. பிராந்தியத்தில் உள்ள நாடுகள் அமெரிக்கப் படைகளைத் தங்கள் மண்ணிலிருந்து வெளியேற்ற வேண்டும்." என்று அவர் தெரிவித்துள்ளார்.
இஸ்ரேல்
இஸ்ரேலின் தற்போதைய மதிப்பீடு
இஸ்ரேலிய அதிகாரிகளின் கூற்றுப்படி, கடுமையான குண்டுவீச்சுகள் மற்றும் ஈரான் உச்ச தலைவர் அயதுல்லா அலி காமேனி கொல்லப்பட்ட போதிலும், ஈரான் அரசு உடனடியாக வீழ்ந்துவிடும் என்பதற்கான அறிகுறிகள் தென்படவில்லை. அமெரிக்க அதிபர் டிரம்ப் போர் விரைவில் முடியும் என்று கூறினாலும், அமெரிக்கா இப்போதைக்குத் தாக்குதலை நிறுத்தும் எண்ணத்தில் இல்லை என்றே இஸ்ரேல் கருதுகிறது. தொடர் ஏவுகணைத் தாக்குதல்கள் மற்றும் பொருளாதாரத் தடைகள் காரணமாக ஈரான் மக்கள் கடும் அவதிக்குள்ளாகி வருகின்றனர். போராட்டங்கள் ஒடுக்கப்பட்டதாலும், போர் அச்சத்தாலும் மக்கள் வீதிகளுக்கு வர அஞ்சி வருகின்றனர். ஈரானின் நீண்ட காலப் பொருளாதார நிலைமை முன் எப்போதும் இல்லாத அளவுக்கு மோசமடைந்துள்ளது குறிப்பிடத்தக்கது.