விமானத்தை வாடகைக்கு எடுத்து இந்தியர்களை நாடு கடத்திய அமெரிக்கா; பின்னணி என்ன?
செய்தி முன்னோட்டம்
சட்டவிரோதமாக தங்கள் நாட்டில் தங்கியிருக்கும் இந்தியர்களை நாடு கடத்துவதற்கு அமெரிக்கா சார்ட்டர்ட் விமானத்தை வாடகைக்கு எடுத்துள்ளது.
இது இந்திய அரசாங்கத்தின் முழு ஒத்துழைப்புடன் செய்யப்பட்டுள்ளதாக அமெரிக்காவின் உள்நாட்டுப் பாதுகாப்புத் துறை தெரிவித்துள்ளது.
இந்த வாடகை விமானம் அக்டோபர் 22ஆம் தேதி இந்தியாவுக்கு அனுப்பப்பட்டதாக அமெரிக்கா வெள்ளிக்கிழமை (அக்டோபர் 25) தெரிவித்துள்ளது.
"அமெரிக்காவில் தங்குவதற்கு சட்டப்பூர்வ அனுமதி இல்லாத இந்திய குடிமக்கள் விரைவாக அகற்றப்படுவார்கள்.
மேலும் புலம்பெயர்ந்தவர்கள் கடத்தல்காரர்களின் பொய்களை நம்பி அவர்களின் வலையில் மீண்டும் விழக்கூடாது." என அமெரிக்க உள்நாட்டு பாதுகாப்புத் துறையின் மூத்த அதிகாரி கிறிஸ்டி ஏ கனெகல்லோ கூறினார்.
இதுபோன்ற நாடு கடத்தல் நடவடிக்கை பல ஆண்டுகளாகவே இரு நாடுகளாலும் மேற்கொள்ளப்பட்டு வருகின்றன என்றும் அவர் கூறினார்.
495 விமானங்கள்
நாடு கடத்தலுக்கு 495 விமானங்கள்
ஜூன் 2024 முதல், எல்லைப் பாதுகாப்புப் பிரகடனம் மற்றும் இடைக்கால இறுதி விதி அமலுக்கு வந்ததில் இருந்து, அமெரிக்காவின் தென்மேற்கு எல்லையில் சட்டவிரோத குடியேற்றம் 55 சதவீதம் குறைந்துள்ளன.
2024 நிதியாண்டில், அமெரிக்கா உள்நாட்டு பாதுகாப்புத் துறை தங்கள் நாட்டில் சட்டவிரோதமாக தங்கியிருந்த 1,60,000 நபர்களை நாடு கடத்தி உள்ளது.
இதில் இந்தியா உட்பட 145க்கும் மேற்பட்ட நாடுகளைச் சேர்ந்தவர்கள் இருந்த நிலையில், இவர்களை நாடு கடத்த 495க்கும் மேற்பட்ட விமானங்களை இயக்கியது என்று அந்த அறிக்கையில் கூறப்பட்டுள்ளது.
அமெரிக்காவில் தங்குவதற்கு சட்டப்பூர்வ அடிப்படையின்றி தங்கள் நாட்டினரை திருப்பி அனுப்புவதை ஏற்றுக்கொள்வதற்கு உலகம் முழுவதும் உள்ள வெளிநாட்டு அரசாங்கங்களுடன் தொடர்ந்து இணைந்து செயல்பட்டு வருவதாகவும் அதில் தெரிவிக்கப்பட்டுள்ளது.