லடாக் பிரச்னையை சீக்கிரம் சரிசெய்ய இந்தியா-சீனா ஒப்புக்கொண்டது: பெய்ஜிங்
எல்லைப் பகுதிகளில் அமைதியை நிலை நாட்டுவதுடன், கிழக்கு லடாக்கில் நீடித்து வரும் மோதல்களை சீக்கிரம் சரிசெய்ய இந்தியா மற்றும் சீனாவின் உயர் இராணுவ அதிகாரிகள் ஒப்புக்கொண்டதாக சீன பாதுகாப்பு அமைச்சகம் இன்று(ஏப் 25) தெரிவித்துள்ளது. சீன-இந்திய கார்ப்ஸ் கமாண்டர் நிலைக் கூட்டத்தின் 18வது சுற்று ஏப்ரல் 23 அன்று, சீனாவில் உள்ள சுஷுல்-மோல்டோ எல்லை சந்திப்புப் புள்ளியில் நடைபெற்றது. ஏப்ரல் 27 மற்றும் 28 ஆம் தேதிகளில் ஷாங்காய் ஒத்துழைப்பு அமைப்பின்(SCO) கூட்டத்தில் பங்கேற்பதற்காக சீன பாதுகாப்பு அமைச்சர் லீ ஷங்ஃபு இந்தியாவுக்கு வர இருப்பதை முன்னிட்டு இந்த பேச்சுவார்த்தை நடத்தப்பட்டது.
எல்லை பாதுகாப்பை உறுதி செய்ய நடத்தப்பட்ட பேச்சுவார்த்தை
"இரு நாடுகளும் தொடர்புடைய விஷயங்களில் நேர்மையான கருத்துக்களைப் பரிமாறிக் கொண்டன. இரு தரப்பு தலைவர்களின் வழிகாட்டுதலின் கீழ், இரு நாடுகளும் பிரச்சினைகளைத் தீர்ப்பதற்கும், சீன-இந்திய எல்லைப் பகுதிகளில் அமைதியை தொடர்ந்து பாதுகாக்கவும் ஒப்புக்கொண்டன" என்று சீனாவின் மக்கள் விடுதலை இராணுவம்(PLA) தெரிவித்துள்ளது. இரு தரப்பினரும் தொடர்புடைய பிரச்சினைகளை சீக்கிரம் சரிசெய்வது குறித்து ஆழமான பேச்சு வார்த்தையை நடத்தினர், என்று சீன வெளியுறவுத்துறை செய்தித் தொடர்பாளர் மாவோ நிங் பெய்ஜிங்கில் நடைபெற்ற செய்தியாளர் சந்திப்பில் தெரிவித்தார். "மேற்குத் துறையில் பாதுகாப்பையும் ஸ்திரத்தன்மையையும் பராமரிக்க இரு தரப்பினரும் ஒப்புக்கொண்டனர்," என்று இந்திய வெளியுறவுத்துறை அமைச்சகம் நேற்று தெரிவித்திருந்தது.
