காதலியின் நடமாட்டம் காட்டி கொடுத்த ரகசியம்: நடுக்காட்டில் 'எல் மென்சோ'வை வேட்டையாடிய மெக்ஸிகோ படை
செய்தி முன்னோட்டம்
மெக்ஸிகோவின் மிகவும் தேடப்பட்ட போதைப்பொருள் கடத்தல் மன்னனான 'எல் மென்சோ' என்று அழைக்கப்படும் நெமேசியோ ரூபன் ஓஸ்குவேரா செர்வாண்டஸ், அந்நாட்டு ராணுவத்துடனான மோதலில் நேற்று கொல்லப்பட்டார். ஜாலிஸ்கோ நியூ ஜெனரேஷன் கார்டெல் (CJNG) எனும் சக்திவாய்ந்த போதைப்பொருள் கும்பலின் தலைவனான இவர் மீது அமெரிக்கா மற்றும் மெக்ஸிகோ அரசுகள் பல மில்லியன் டாலர் பரிசுத் தொகை அறிவித்திருந்தது குறிப்பிடத்தக்கது. பல ஆண்டுகளாகத் தலைமறைவாக இருந்த அவரை, அவரது காதலியின் நடமாட்டத்தை வைத்தே ராணுவம் வெற்றிகரமாகக் கண்டறிந்துள்ளது. அவர் எப்படி சுற்றி வளைக்கப்பட்டார் என்பது குறித்த தகவல்கள் தற்போது வெளியாகியுள்ளன.
உளவு
உளவுத்துறையின் வியூகம்
மென்சோவின் நெருங்கிய காதலி ஒருவரை பின்தொடர்ந்த பாதுகாப்புப் படையினர், அவர் கடந்த வெள்ளிக்கிழமை 'Tapalpa' மலைப்பகுதிக்கு சென்றதை கவனித்தனர். அங்கு அவர் தனது கூட்டாளிகளுடன் எல் மென்சோவைச் சந்தித்துள்ளார். அமெரிக்க உளவுத்துறை வழங்கிய கூடுதல் தகவல்கள், அவர் பதுங்கியிருந்த துல்லியமான இடத்தை உறுதி செய்தன. சனிக்கிழமை அந்தப் பெண் அங்கிருந்து வெளியேறியதும், மென்சோ அங்கேயே இருப்பதை உறுதி செய்த மெக்ஸிகோ சிறப்புப் படையினர் இறுதித் தாக்குதலுக்கு தயாராகினர்.
நடவடிக்கை
ராணுவத்தின் நள்ளிரவு வேட்டை
ஞாயிறு அதிகாலைப் பொழுதில், தபால்பா வனப்பகுதியைச் சுற்றி ராணுவம் மற்றும் தேசிய பாதுகாப்புப் படையினர் ஒரு வலுவான வளையத்தை அமைத்தனர். வான்வழி ஆதரவிற்காக ஆறு ஹெலிகாப்டர்கள் மற்றும் கூடுதல் சிறப்புப் படைகள் தயார் நிலையில் வைக்கப்பட்டன. ராணுவம் முன்னேறுவதை கண்ட மென்சோவின் பாதுகாவலர்கள் மிகக் கொடூரமான முறையில் துப்பாக்கிச் சூடு நடத்தி தப்பிக்க முயன்றனர். அடர்ந்த காடுகளுக்குள் தனது இரு பாதுகாவலர்களுடன் தப்பியோட முயன்றபோதுதான் எல் மென்சோ படுகாயமடைந்து பிடிபட்டார். இந்தத் துல்லியமான மற்றும் வன்முறை நிறைந்த மோதலின் முடிவில், பல தசாப்தங்களாக தேடப்பட்டு வந்த ஒரு சகாப்தம் முடிவுக்கு வந்துள்ளது.