ஐரோப்பாவில் தீவிரமடையும் 'Gen Z' இளைஞர்கள் போராட்டம்: ஜெர்மனி, சுவிட்சர்லாந்தில் வன்முறை
செய்தி முன்னோட்டம்
பிரான்சில் கல்வித் துறை புறக்கணிப்பு மற்றும் பல்கலைக்கழக சேர்க்கை முறைகேடுகளுக்கு எதிராகத் தொடங்கிய இளைஞர்களின் போராட்டம், தற்போது ஜெர்மனி, சுவிட்சர்லாந்து உள்ளிட்ட பல்வேறு ஐரோப்பிய நாடுகளுக்கும் வேகமாக பரவி வன்முறையாக உருவெடுத்துள்ளது. GenZ regelt என்ற பெயரில் ஒருங்கிணைக்கப்பட்ட இப்போராட்டங்கள், சனிக்கிழமை அன்று ஜெர்மனியின் 30-க்கும் மேற்பட்ட நகரங்களில் தீவிரமாக நடைபெற்றது. ஜெர்மனியில் பகல் நேரத்தில் அமைதியான முறையில் நடைபெற்ற பேரணிகள், இரவு நேரத்தில் வன்முறையாக மாறின. போராட்டக்காரர்கள் காவல்துறையினர் மீது தாக்குதல் நடத்தியதுடன், கடைகளையும் சூறையாடினர். பிராங்பேர்ட் நகரில் வன்முறை உச்சத்தை எட்டியது. 17 கடைகளின் கண்ணாடிகள் உடைக்கப்பட்டு, 5 கடைகள் முற்றிலுமாகச் சூறையாடப்பட்டன. இதில் 1,000 முதல் 1,500 பேர் வரை வன்முறையில் ஈடுபட்டதாக அம்மாநில உள்துறை அமைச்சர் தெரிவித்துள்ளார்.
சுவிட்சர்லாந்து
சுவிட்சர்லாந்திலும் பரவிய போராட்டம்
ஜெர்மனியை தொடர்ந்து சுவிட்சர்லாந்தின் சூரிச் மற்றும் பாசெல் ஆகிய நகரங்களிலும் அனுமதியின்றி இளைஞர்கள் போராட்டங்களை நடத்தினர்.
சூரிச் நகரில் பட்டாசுகளை கொளுத்தி பேருந்து நிறுத்தங்களை சேதப்படுத்திய கூட்டத்தைக் கலைக்க காவல்துறையினர் தண்ணீரைப் பாய்ச்சியும், கண்ணீர்ப்புகை குண்டுகள் மற்றும் ரப்பர் குண்டுகளைப் பயன்படுத்தியும் அதிரடி நடவடிக்கை எடுத்தனர்.
பாசெல் நகரில் குப்பைத் தொட்டிகள் மற்றும் உலோகத் தடுப்புகளைக் கொண்டு போராட்டக்காரர்கள் வீதிகளில் தீ வைத்தனர்.
கோரிக்கை
இளைஞர்களின் பிரதானக் கோரிக்கைகள்
ஐரோப்பா முழுவதும் பரவி வரும் இப்போராட்டங்களின் பின்னணியில் இளைஞர்களின் பொதுவான பொருளாதார மற்றும் சமூகக் கவலைகள் நிலவுகின்றன.
சிறந்த கல்விச் சூழல், மலிவு விலையிலான வீட்டு வசதி மற்றும் வாழ்க்கை செலவினங்களை குறைக்கக் கோரி இளைஞர்கள் குரல் எழுப்பி வருகின்றனர்.
ஜெர்மனியில் கட்டாய ராணுவப் பயிற்சி நடைமுறை மற்றும் அரசின் தீவிரக் கண்காணிப்பு நடவடிக்கைகளுக்கு இளைஞர்கள் கடும் எதிர்ப்பு தெரிவித்து வருகின்றனர்.
பிரான்சில் 560-க்கும் மேற்பட்டோர் கைது செய்யப்பட்டுப் பல இடங்களில் ஊரடங்கு அமல்படுத்தப்பட்டுள்ள நிலையில், இப்போராட்டம் ஸ்பெயின், போர்ச்சுகல், இத்தாலி, அல்பேனியா மற்றும் நெதர்லாந்து ஆகிய நாடுகளுக்கும் பரவியுள்ளது.
தீவிர இடதுசாரி அமைப்புகளே இந்த அமைதியான போராட்டங்களை வன்முறையாக மாற்றியதாக ஜெர்மனி மத்திய உள்துறை அமைச்சர் அலெக்சாண்டர் டோப்ரிண்ட் குற்றம் சாட்டியுள்ளார்.