காசா போர் நிறுத்தத்திற்கு எதிர்ப்பு: ஐநா தீர்மானத்திற்கு எதிராக வீட்டோ அதிகாரத்தை பயன்படுத்தியது அமெரிக்கா
செய்தி முன்னோட்டம்
காசாவில் உடனடி மனிதாபிமான போர்நிறுத்தம் கோரி பெரும்பாலான நாடுகளின் ஆதரவுடன் ஐக்கிய நாடுகள் சபை நிறைவேற்ற இருந்த தீர்மானத்தை வீட்டோ அதிகாரத்தை பயன்படுத்தி முறியடித்தது அமெரிக்கா.
கடந்த அக்டோபர் 7ஆம் தேதி பாலஸ்தீன பயங்கரவாத குழுவான ஹமாஸ், இஸ்ரேல் மீது திடீர் வான்வழி தாக்குதலை நடத்தி 1,200 இஸ்ரேலியர்களை கொன்றது.
அதனை தொடர்ந்து, பலஸ்தீன மக்கள் வாழும் காசா பகுதி மீது இஸ்ரேல் தனது தாக்குதலை தொடங்கியது.
இரண்டு மாதமாக தொடர்ந்து இஸ்ரேல் நடத்தும் தாக்குதலால் இதுவரை 17,487 பாலஸ்தீனியர்கள் கொல்லப்பட்டுள்ளனர்.
இந்த போரை நிறுத்த வேண்டும் என்று பல்வேறு நாடுகள் கோரிக்கை விடுத்து வருகின்றன.
ஐநா சபையும் தொடர்ந்து இதை வலியுறுத்தி வருகிறது.
தக்ஜயூ;
'மொத்த பாலஸ்தீன மக்களையும் தண்டிக்க முடியாது': ஐநா
இந்நிலையில், நேற்று அரிதாகப் பயன்படுத்தப்படும் ஐ.நா சாசனத்தின் 99வது சட்டப்பிரிவை உபயோகித்த ஐ.நா பொதுச்செயலாளர் அன்டோனியோ குட்டெரெஸ், உடனடியாக போர்நிறுத்தத்திற்கு அழைப்பு விடுக்கும் அவசர பாதுகாப்பு கவுன்சில் கூட்டத்தை கூட்டினார்.
அந்த கூட்டத்தின் போது பேசிய அவர், ஹமாஸ் பயங்கரவாத குழு நடத்திய தாக்குதலுக்கு மொத்த பாலஸ்தீன மக்களையும் தண்டிக்க முடியாது என்று கூறினார்.
மேலும், இஸ்ரேலிய பிணையகைதிகளை ஹமாஸ் விடுவிக்க வேண்டும் என்றும் அவர் வலியுறுத்தினார்.
ஆனால், இந்த கூட்டத்தின் போது, வீட்டோ அதிகாரத்தை பயன்படுத்திய அமெரிக்கா, காசாவில் உடனடி மனிதாபிமான போர்நிறுத்தம் கோரும் தீர்மானத்தை முறியடித்தது.
காசா மீது இஸ்ரேல் நடத்தும் தாக்குதலுக்கு அமெரிக்கா ஆயுதங்களை சப்ளை செய்து வருகிறது என்பதும் ஒரு சர்ச்சைக்குரிய விஷயமாகும்.