பூடானில் பனிப்பாறை ஏரி உடைப்பு: மேற்கு வங்காளம் மற்றும் அசாமுக்கு வெள்ள அபாய எச்சரிக்கை
செய்தி முன்னோட்டம்
பூடான் நாட்டின் காசா மாவட்டத்தில் உள்ள சின்தாபு பனிப்பாறை ஏரியில் வியாழக்கிழமை மாலை திடீரென உடைப்பு ஏற்பட்டு பிரம்மாண்ட வெள்ளப்பெருக்கு (GLOF) உருவாகியுள்ளது. இந்த பனிப்பாறை ஏரி வெள்ளம் இந்திய எல்லையை நோக்கி அதிவேகமாகப் பாய்ந்து வருவதால், மேற்கு வங்காளம் மற்றும் அசாம் மாநிலங்களுக்கு இந்திய அரசு வெள்ள அபாய எச்சரிக்கையை விடுத்துள்ளது. பூடானின் ஆபத்தான 17 பனிப்பாறை ஏரிகளில் ஒன்றான சின்தாபு ஏரி, புனாட்சாங்சு நதிப் படுகையில் அமைந்துள்ளது. பனிப்பாறைகள் உருகுவதால் உருவாகும் ஏரியை அடைத்து வைத்துள்ள இயற்கை அணை போன்ற அமைப்பு உடைந்ததால், லட்சக்கணக்கான கன அடி நீர் திடீரென கீழே பாயத் தொடங்கியது. ஏரி உடைந்ததைத் தொடர்ந்து ஆற்றுப்படுகைகளில் வசிக்கும் மக்கள் உடனடியாக பாதுகாப்பான இடங்களுக்கு வெளியேற்றப்பட்டனர்.
வெள்ளப்பெருக்கு
சங்கோஷ் நதியில் உருவாகும் வெள்ளப்பெருக்கு
பூடானில் 'புனாட்சாங்சு' என அழைக்கப்படும் இந்த நதி, இந்திய எல்லைக்குள் நுழைந்தவுடன் 'சங்கோஷ்' நதி எனப் பெயர் பெறுகிறது.
பனிப்பாறை நீர் 6 முதல் 8 மணி நேரத்திற்குள் இந்திய-பூடான் எல்லையை அடையும் என எதிர்பார்க்கப்படுகிறது.
மேற்கு வங்கத்தின் அலிபுர்துவார், ஜல்பைகுரி, டார்ஜிலிங் மலைப்பகுதிகள் மற்றும் அசாமின் துப்ரி ஆகிய மாவட்டங்களில் உள்ள கரையோர மக்களுக்கு பலத்த எச்சரிக்கை விடுக்கப்பட்டுள்ளது.
நிலைமையின் தீவிரத்தை கருத்தில் கொண்டு, மேற்கு வங்கத்தின் கூச் பிஹார் மாவட்டம், துஃபான்கஞ்ச் மற்றும் போக்ஸிர்ஹாட் ஆகிய பகுதிகளில் தேசியப் பேரிடர் மீட்புப் படை மற்றும் மாநிலப் பேரிடர் மீட்புப் படையினர் மீட்பு உபகரணங்களுடன் களமிறக்கப்பட்டுள்ளனர்.