துபாயில் விற்பனைக்கு வந்திருக்கும் மிக விலையுயர்ந்த வீடு, என்ன ஸ்பெஷல்?
துபாயின் எமிரேட்ஸ் ஹில்ஸில் உள்ள விலையுயர்ந்த சொகுசு வீடு ஒன்று சந்தையில் விற்பனைக்கு வந்திருக்கிறது. இந்த சொகுசு வீட்டினை லக்ஸ்ஹேபிடட் சூத்பீ இன்டர்நேஷனல் ரியால்டி என்ற நிறுவனம் அதன் உரிமையாளர் சார்பில் விற்பனை செய்யவிருக்கிறது. அந்த நிறுவனமானது இந்த வீட்டிற்கு 750 மில்லியன் திர்ஹாம்ஸ் (இந்திய மதிப்பில் சுமார் 1,600 கோடி ரூபாய்) விலையை நிர்ணயித்திருக்கிறது. இதற்கு முன் 2022 ஆகஸ்டில் இதே சுற்றுப்புறத்தைச் சேர்ந்த வீடு ஒன்று 210 மில்லியன் திர்ஹாம்ஸூக்கு விற்பனை செய்யப்பட்டது. எனினும், அந்த வீடானது ஒரு சதுரஅடிக்கு 5,614 திர்ஹாம்ஸ் என்ற விலையிலேயே விற்பனை செய்யப்பட்டது. ஆனால், தற்போது விற்பனைக்கு வந்திருக்கக்கூடிய இந்த வீட்டிற்கோ சதுரடிக்கு 12,500 திர்ஹாம்ஸ் என்ற விலை நிர்ணயிக்கப்பட்டிருக்கிறது.
மார்பில் பேலஸ்:
இந்த வீட்டினை, 100 மில்லியன் திர்ஹாம்ஸ் மதிப்புடைய இத்தாலிய மார்பில் கற்களைக் கொண்டு கட்டமைத்திருக்கிறார்கள். எனவே, இதன் விற்பனையாளரால் 'மார்பில் பேலஸ்' என செல்லமாக அழைக்கப்பட்டு வருகிறது இந்த வீடு. இந்த வீட்டை கட்டிமுடிக்க கிட்டத்தட்ட 12 வருடங்கள் ஆனதாம். 2018-ல் தான் இந்த வீடு கட்டி முடிக்கப்பட்டிருக்கிறது. 60,000 சதுரடிகள் பரப்பளவில், ஐந்து படுக்கையறைகள் கொண்ட இந்த வீட்டின் முதன்மை படுக்கையறையின் அளவு 4,000 சதுரடிகள். 15 கார்களை நிறுத்தி வைக்கும் அளவுடைய கார் கேரேஜ், 19 குளியலறைகள், வீட்டுற்குள்ளும், வீட்டிற்கு வெளியிலும் நீச்சள் குளங்கள், இரண்டு டோம்கள், 80,000 லிட்டர் கொள்ளளவு கொண்ட பவளப் பாறை அக்வாரியம் ஆகியவை வீட்டினுள் அமைக்கப்பட்டிருக்கிறதாம். இந்த வீட்டின் மொத்தப் பரப்பளவு 70,000 சதுரடிகள்.
