பாகிஸ்தான் காவல் நிலையத்தில் குண்டு வெடிப்பு: 13 பேர் பலி
பாகிஸ்தான் காவல் நிலையத்தில் ஏற்பட்ட குண்டுவெடிப்புகளால் குறைந்தது 13 பேர் கொல்லப்பட்டனர் என்றும் 50க்கும் மேற்பட்டோர் காயமடைந்தனர் என்றும் போலீசார் தெரிவித்துள்ளனர். வடமேற்கு ஸ்வாட் பள்ளத்தாக்கில் இருக்கும் கபால் நகரில் உள்ள பயங்கரவாத எதிர்ப்பு அலுவலகத்தில் இந்த குண்டு வெடிப்புகள் ஏற்பட்டிருக்கிறது. 2009க்கு முன், இந்த அலுவலகம் பயங்கரவாதிகளின் கட்டுப்பாட்டில் இருந்தது என்பது குறிப்பிடத்தக்கது. மின்சார ஷார்ட் சர்க்யூட் காரணமாக அலுவலகத்தில் இருந்த வெடிமருந்துகள் வெடித்திருக்கலாம் என்று சந்தேகிக்கப்படுகிறது. வெளியில் இருந்து தாக்குதல் நடத்தப்பட்டதற்கான எந்த ஆதாரமும் இதுவரை கிடைக்கவில்லை.
வெடி விபத்துகள் ஏற்பட்டதால் இடிந்து விழுந்த காவல்துறை கட்டிடம்
இந்த குண்டு வெடிப்பு குறித்து வெவ்வேறு கோணங்களில் விசாரணை நடத்தப்பட்டு வருகிறது. பெரும்பாலும் காவல்துறை அதிகாரிகளே இந்த குண்டு வெடிப்பில் உயிரிழந்துள்ளனர். குண்டுவெடிப்பு சம்பவம் நடந்த போது, அந்த வழியாக சென்று கொண்டிருந்த ஒரு பெண் மற்றும் அவரது குழந்தையும் இதனால் பலியாகி உள்ளனர். "நிறைய ஆயுதங்கள் வைக்கப்பட்டிருந்த ஒரு கிடங்கு எங்களிடம் இருந்தது. கவனக்குறைவால் அங்கு குண்டு வெடிப்பு ஏற்பட்டிருக்கலாம் என்று சந்தேகிறோம்." என தீவிரவாத தடுப்பு பிரிவின் பிராந்திய தலைவர் சோஹைல் காலிட் தெரிவித்துள்ளார். காவல் நிலையத்திற்குள் வெடி விபத்துகள் ஏற்பட்டதால் கட்டிடம் முற்றிலுமாக இடிந்து விழுந்தது.
