ஆசியாவிலேயே முதல் விளையாட்டு வீரர்! விராட் கோலி புதிய சாதனை!
ஐபிஎல் 2023இல் பல புதிய சாதனைகளை படைத்த விராட் கோலி தற்போது ஆசியாவிலேயே இதுவரை யாரும் அடையாத உச்சத்தை அடைந்துள்ளார். விராட் கோலி இன்ஸ்டாகிராமில் 250 மில்லியன் ஃபாலோயர்ஸ்களை எட்டியுள்ளார். இதன் மூலம் இன்ஸ்டாகிராமில் 250 மில்லியன் ஃபாலோயர்ஸ்களை கொண்ட முதல் ஆசிய விளையாட்டு வீரர் என்ற பெருமையைப் பெற்றார். ஐபிஎல்லில் அவர் பெற்றிருந்த ராயல் சேலஞ்சர்ஸ் பெங்களூர் அணி பிளேஆப் சுற்றுக்கு முன்னேறாத நிலையில், விராட் கோலி கடந்த இரண்டு நாட்களாக இன்ஸ்டாகிராம் மற்றும் ட்விட்டரில் டிரெண்டிங்கில் இருந்தார். இதனால் கோலியின் ஃபாலோயர்ஸ் எண்ணிக்கையும் அதிகரித்துள்ளது.
அதிக ஃபாலோயர்ஸ் கொண்ட வீரர்கள்
தற்போது, கோலியின் இன்ஸ்டாகிராம் கணக்கில் 250 மில்லியன் ஃபாலோயர்ஸ்களுடன் 1,601 பதிவுகள் உள்ளன. சச்சின் டெண்டுல்கர், ஏபி டி வில்லியர்ஸ் மற்றும் ரொனால்டோ போன்ற சுமார் 278 பேரை விராட் கோலி பின்தொடர்கிறார். ஆசிய அளவில் விளையாட்டு வீரர்களில் விராட் கோலிக்கு அடுத்து எம்எஸ் தோனி மற்றும் சச்சின் டெண்டுல்கர் உள்ளனர். ஒட்டுமொத்தமாக, விளையாட்டில் கிறிஸ்டியானோ ரொனால்டோ இன்ஸ்டாகிராமில் 585 மில்லியன் ஃபாலோயர்ஸ்களுடன் முதலிடத்தில் உள்ளார். அவருக்கு அடுத்தபடியாக லியோனல் மெஸ்ஸி 462 மில்லியன் ஃபாலோயர்ஸ்களுடன் இரண்டாவது இடத்தில் உள்ளார். இதற்கிடையே ஐபிஎல் தொடரிலிருந்து வெளியேறிய நிலையில், உலக டெஸ்ட் சாம்பியன்ஷிப் இறுதிப்போட்டிக்காக விராட் கோலி லண்டன் சென்றுள்ளது குறிப்பிடத்தக்கது.
