15 வயதில் வரலாறு படைத்த சூர்யவன்ஷி: ஆசிய விளையாட்டில் தங்கம் வென்று புதிய வரலாறு

எழுதியவர் Vasuki

Oct 05, 2026

01:49 pm

செய்தி முன்னோட்டம்

பாகிஸ்தானுக்கு எதிரான ஆசிய விளையாட்டு கிரிக்கெட் இறுதிப் போட்டியில் இந்திய அணி தங்கம் வென்றதன் மூலம், 15 வயதில் தங்கம் வென்று ஆசிய விளையாட்டு வரலாற்றிலேயே மிக இளம் இந்தியப் பதக்க நாயகன் என்ற சாதனையை வைபவ் சூர்யவன்ஷி படைத்துள்ளார். ஜப்பானின் ஐச்சி-நகோயாவில் நடைபெற்ற 2026 ஆசிய விளையாட்டுப் போட்டியில் 21 தங்கம் உட்பட 85 பதக்கங்களைக் குவித்து இந்தியா வரலாற்றுச் சாதனை படைத்துள்ளது. இத்தொடரில் இந்தியாவிற்கு பெருமை சேர்த்த தங்கப் பதக்கங்களில் ஒன்றாக அமைந்தது ஆடவர் கிரிக்கெட் அணியின் வெற்றியாகும். பாகிஸ்தானை இறுதி ஆட்டத்தில் 19 ரன்கள் வித்தியாசத்தில் வீழ்த்தி இந்திய அணி தங்கத்தைக் கைப்பற்றிய வேளையில், அணியின் இளம் தொடக்க ஆட்டக்காரரான 15 வயது வைபவ் சூர்யவன்ஷி வரலாற்றில் இடம்பெற்றுள்ளார்.

சௌரப் சவுத்ரி

சௌரப் சவுத்ரி சாதனையை விஞ்சிய சூர்யவன்ஷி

தனது 15 வயது, 6 மாதங்கள் மற்றும் 6 நாட்களில் தங்க பதக்கத்தை முத்தமிட்டதன் மூலம், ஆசிய விளையாட்டு வரலாற்றிலேயே தங்கம் வென்ற மிக இளம் இந்திய வீரர் என்ற மகத்தான சாதனையை வைபவ் சூர்யவன்ஷி படைத்துள்ளார்.

இதற்கு முன்பு, கடந்த 2018 ஜகார்த்தா ஆசிய விளையாட்டுப் போட்டியில் 10 மீட்டர் ஏர் பிஸ்டல் துப்பாக்கிச் சுடுதல் பிரிவில் சௌரப் சவுத்ரி தனது 16 வயது, 3 மாதங்கள் மற்றும் 9 நாட்களில் தங்கம் வென்றதே இளம் இந்தியரின் சாதனையாக இருந்தது.

அந்த 8 ஆண்டுகால வரலாற்று சாதனையை தற்போது வைபவ் சூர்யவன்ஷி தவிடுபொடியாக்கியுள்ளார்.

இறுதி ஆட்டம்

அதிரடியான இன்னிங்ஸ்

இந்திய அணியின் தொடக்க வீரராகக் களமிறங்கிய வைபவ், இலங்கை அணிக்கு எதிரான அரையிறுதிப் போட்டியில் சுழற்பந்து வீச்சுக்குச் சாதகமான கடினமான ஆடுகளத்தில் 21 பந்துகளில் 6 பவுண்டரிகள், 2 சிக்ஸர்களுடன் 38 ரன்கள் விளாசி அணியின் வெற்றிக்கு அடித்தளம் அமைத்தார்.

பாகிஸ்தானுக்கு எதிரான இறுதிப் போட்டியிலும் 9 பந்துகளில் 15 ரன்கள் சேர்த்து அதிரடி தொடக்கத்தைத் தந்தார்.

இறுதிப் போட்டியில் அபிஷேக் சர்மாவின் அதிரடி அரைசதம் (61 ரன்கள்), திலக் வர்மாவின் ஆட்டமிழக்காத 51 ரன்கள் மற்றும் ஷிவம் துபேவின் அதிரடியால் இந்தியா 211 ரன்களைக் குவித்தது.

பாகிஸ்தானை 182 ரன்களுக்குள் கட்டுப்படுத்தி இந்திய அணி தங்கம் வென்றதன் மூலம், உலக கிரிக்கெட் அரங்கிலும் ஆசிய விளையாட்டிலும் சூர்யவன்ஷி புதிய சகாப்தத்தைப் படைத்துள்ளார்.