ஐபிஎல் ஏலத்திற்கு முன் ஜொலிக்க பொன்னான வாய்ப்பு: சையத் முஷ்டாக் அலி தொடரில் களமிறங்கும் தமிழ்நாடு வீரர்கள்
செய்தி முன்னோட்டம்
வரும் டிசம்பர் 16-ஆம் தேதி கோவாவில் நடைபெறவுள்ள ஐபிஎல் 2027 மினி ஏலத்திற்கு முன்னதாக, அனைத்து ஐபிஎல் அணிகளின் கவனத்தையும் ஈர்க்கும் முக்கியத் தேர்வுக் களமாக 2026-27 சையத் முஷ்டாக் அலி டி20 கோப்பைத் தொடர் இன்று (நவ. 14) தொடங்கியுள்ளது. சாய் கிஷோர் தலைமையிலான தமிழ்நாடு அணி, மத்தியப் பிரதேசத்தின் இந்தூர் நகரில் நடைபெறும் தனது முதல் லீக் ஆட்டத்தில் இன்று ரயில்வே அணியை எதிர்கொள்கிறது. எலைட் குரூப் 'பி' பிரிவில் டெல்லி, பஞ்சாப், பீகார், ஹரியானா, ஜம்மு-காஷ்மீர் மற்றும் சௌராஷ்டிரா ஆகிய பலம் வாய்ந்த அணிகளுடன் இடம்பெற்றுள்ள தமிழ்நாடு, தனது திறமையை நிரூபிக்கத் தயாராக உள்ளது.
பேட்டிங்
பேட்டிங்கில் மிரட்டத் தயாராகும் பி. சச்சின் மற்றும் துஷார் ரஹேஜா
இந்தத் தொடரில் ஐபிஎல் அணிகளின் பார்வை அதிகம் குவிந்திருப்பது தமிழ்நாட்டின் இளம் டாப்-ஆர்டர் பேட்டர்களான பி. சச்சின் மற்றும் துஷார் ரஹேஜா மீதுதான்.
நடந்து முடிந்த டிஎன்பிஎல் தொடரில் 53.50 சராசரி மற்றும் 160.9 ஸ்ட்ரைக் ரேட்டுடன் 428 ரன்கள் குவித்து அசத்திய பி. சச்சின், இந்திய அணியில் முத்திரை பதித்துள்ள சாய் சுதர்சனுடன் ஒப்பிடப்படுகிறார்.
அதேபோல், விக்கெட் கீப்பர்-பேட்டர் துஷார் ரஹேஜா, கடந்த டிஎன்பிஎல் சீசனில் 190.09 என்ற அதிரடி ஸ்ட்ரைக் ரேட்டுடன் ஒரு சதம் மற்றும் மூன்று அரைசதங்கள் உட்பட 422 ரன்கள் குவித்து தனது அதிரடித் திறனை வெளிப்படுத்தியுள்ளார்.
தொடக்கத்திலேயே எதிரணியை நிலைகுலையச் செய்யும் இவரது ஆட்டத்திறன் பல ஐபிஎல் அணிகளைக் கவரும் என எதிர்பார்க்கப்படுகிறது.
எதிர்பார்ப்பு
ஐபிஎல் ஏலத்தில் கவனம் ஈர்க்கும் தமிழக வீரர்கள்
ராபின் உத்தப்பாவின் வழிகாட்டுதலில் பேட்டிங்கை மெருகேற்றியுள்ள விக்கெட் கீப்பர் என். ஜெகதீசனுக்கு, ரிஷப் பந்தை விடுவித்துள்ள லக்னோ அணியில் வாய்ப்பு பிரகாசமாக உள்ளது.
கலீல் அகமதுவை விடுவித்துள்ள சென்னை சூப்பர் கிங்ஸ் அணிக்கு, டிஎன்பிஎல் தொடரில் 7.2 எகானமியுடன் துல்லியமாக யார்க்கர் வீசிய அதிசயராஜ் டேவிட்சன் சிறந்த தேர்வாக அமையலாம்.
மேலும், டிஎன்பிஎல் இறுதிப்போட்டியில் 47 பந்துகளில் 82 ரன்கள் விளாசி கோவை கிங்ஸ் அணிக்குக் கோப்பை வென்று தந்த மிடில்-ஆர்டர் பேட்டர் ஆண்ட்ரே சித்தார்த், குஜராத் மற்றும் லக்னோ அணிகளின் கவனத்தை ஈர்த்துள்ளார்.