ஸ்போர்ட்ஸ் ரவுண்டு அப்: இன்றைய ட்ரெண்டிங் விளையாட்டு செய்திகள்
சென்னை நுங்கம்பாக்கத்தில் நடைபெற்று வரும் சென்னை ஓபன் சேலஞ்சர் டென்னிஸ் போட்டியில், ஆண்கள் ஒற்றையர் 2-வது சுற்றில் இந்தியாவை சேர்ந்த டென்னிஸ் வீரர் சுமித் நாகல் 7-5, 6-2 என்ற நேர் செட்டில் இத்தாலியை சேர்ந்த போனியோவை வீழ்த்தி காலிறுதி சுற்றுக்கு முன்னேறியுள்ளார். மற்றொரு ஆட்டத்தில் இத்தாலியை சேர்ந்த லுகா நார்டி 7-5, 6-3 என்ற நேர் செட்டில் ஆஸ்திரேலியா வீரர் பெர்னார்ட் டாமிக்கை வீழ்த்தினார். மறுபுறம், இரட்டையர் பிரிவில் இந்தியாவின் ராம்குமார்- சகெத் மைனெனி இணை, 7-6 (3), 6-4 என்ற நேர் செட்டில் ராய் ஹோ- மாதுஸ்சிவ்ஸ்கி ஜோடியை வென்றது
டி.என்.பி.எல். வீரர்கள் ஏலம்: 8 அணிகள் பங்கேற்பு
8-வது தமிழ்நாடு பிரிமீயர் லீக் (டி.என்.பி.எல்) 20 ஓவர் கிரிக்கெட் போட்டி தொடர், வரும் ஜூலை 5-ஆம் தேதி முதல் ஆகஸ்டு 4-ஆம் தேதி வரை நடைபெறவுள்ளது. இந்த போட்டியில், சேலம் ஸ்பார்டன்ஸ், சேப்பாக் சூப்பர் கில்லீஸ், கோவை கிங்ஸ், மதுரை பாந்தர்ஸ், திருச்சி கிராண்ட் சோழாஸ், நெல்லை ராயல் கிங்ஸ், திண்டுக்கல் டிராகன்ஸ், திருப்பூர் தமிழன்ஸ் ஆகிய 8 அணிகள் பங்கேற்கின்றன. இந்த அணிகளுக்கான வீரர்களின் ஏலம் நேற்று நடைபெற்றது. இந்த போட்டி தொடரின் லீக் ஆட்டங்கள் சேலம், திண்டுக்கல், நெல்லை, கோவை ஆகிய நகரங்களில் நடைபெறும். இறுதிப்போட்டி சென்னையில் நடக்கும்.
ஜூனியர் உலகக்கோப்பை 2வது அரையிறுதி போட்டி
15-வது ஜூனியர் உலகக் கோப்பை கிரிக்கெட் போட்டியின் இரண்டாவது அரையிறுதி போட்டி இன்று ஆஸ்திரேலியா மற்றும் பாகிஸ்தான் அணிகளுக்கு இடையே நடைபெறுகிறது. இதில் வெற்றி பெறும் அணி, வரும் பிப்ரவரி 11ஆம் தேதி பெனோனியில் நடைபெறும் இறுதி போட்டியில், இந்தியா அணியுடன் மோதும். தென்ஆப்பிரிக்காவில் நடைபெற்றுவரும் இப்போட்டி தொடரில், சூப்பர் சிக்ஸ் சுற்று முடிவில் முறையே குரூப்-1 பிரிவில் இருந்து இந்தியா, பாகிஸ்தானும், குரூப்2 பிரிவில் இருந்து ஆஸ்திரேலியா, தென்ஆப்பிரிக்காவும் முதல் இரண்டு இடங்களை பிடித்திருந்தது. முன்னதாக கடந்த 6ஆம் தேதி நடைபெற்ற முதலாவது அரையிறுதி ஆட்டத்தில் இந்திய அணி, தென் ஆப்பிரிக்காவை வீழ்த்தி இறுதிப்போட்டிக்கு முன்னேறியது.
இங்கிலாந்து vs இந்தியா டெஸ்ட் தொடர்: அடுத்த 2 போட்டிகளிலிருந்தும் கோலி விலகுகிறாரா?
இந்தியாவில் சுற்றுப்பயணம் மேற்கொண்டுள்ள இங்கிலாந்து அணி, 5 போட்டிகள் கொண்ட டெஸ்ட் தொடரில் விளையாடி வருகிறது. இதில் முதல் இரண்டு டெஸ்ட் போட்டிகளில் விராட் கோலி, தனிப்பட்ட காரணங்களுக்காக விளையாடவில்லை. இந்த நிலையில், முதல் டெஸ்டில் இந்தியா 28 ரன்கள் வித்தியாசத்தில் தோல்வி அடைந்தது. அடுத்த போட்டியில், 106 ரன் வித்தியாசத்தில் வெற்றி பெற்று, தொடரை சமன் செய்துள்ளது. இந்த சூழலில், அடுத்துள்ள இரண்டு போட்டிகளிலும் விராட் கோலி பங்கேற்கமாட்டார் என செய்தி வெளியாகியுள்ளது. விராட் கோலியின் மனைவி அனுஷ்கா சர்மா, கர்ப்பமாக இருப்பதுவே கோலி போட்டி தொடரை மிஸ் செய்வதற்கான காரணம் எனவும் கூறப்படுகிறது.
