டெல்லி கேப்பிடல்ஸ் அணியின் புதிய தலைமை பயிற்சியாளராக சௌரவ் கங்குலி நியமனம்
செய்தி முன்னோட்டம்
IPL டி20 தொடரில் தனது முதல் சாம்பியன் கோப்பையை வெல்லும் முனைப்பில் தீவிரமாக இயங்கி வரும் டெல்லி கேப்பிடல்ஸ் அணி நிர்வாகம், வரவிருக்கும் ஐபிஎல் 2027 ஏலத்திற்கு முன்பாகத் தனது தலைமைப் பயிற்சியாளரை மாற்றும் அதிரடி நடவடிக்கையை மேற்கொண்டுள்ளது. கடந்த பருவத்தில் அணியை வழிநடத்திய ஹேமங் பதானிக்கு பதிலாக, இந்திய அணியின் முன்னாள் கேப்டனும் பிசிசிஐயின் முன்னாள் தலைவருமான சௌரவ் கங்குலி டெல்லி கேப்பிடல்ஸ் அணியின் புதிய தலைமைப் பயிற்சியாளராக அதிகாரப்பூர்வமாக நியமிக்கப்பட்டுள்ளார். கடந்த இரண்டு சீசன்களாக டெல்லி அணி பிளே-ஆஃப் சுற்றுக்குத் தகுதிபெறத் தவறிய நிலையில், அணியின் வியூகம், ஏலத் திட்டமிடல் மற்றும் வீரர்கள் தேர்வு உள்ளிட்ட பல்வேறு அம்சங்களை வலுப்படுத்தும் நோக்கில் இந்த முக்கிய முடிவு எடுக்கப்பட்டுள்ளது.
கங்குலி
டெல்லி அணியுடன் நீண்டகாலப் பயணம்
சௌரவ் கங்குலிக்கு டெல்லி கேப்பிடல்ஸ் அணியுடன் கடந்த பல ஆண்டுகளாக நெருங்கிய தொடர்பு இருந்து வருகிறது.
கடந்த 2019-ஆம் ஆண்டு ஆலோசகராக டெல்லி அணியில் இணைந்த அவர், பின்னர் ஆடவர் மற்றும் மகளிர் ஆகிய இரு அணிகளுக்குமான கிரிக்கெட் இயக்குநராகப் பணியாற்றி வந்தார்.
தற்போது முதன்முறையாக ஐபிஎல் தொடரில் ஒரு அணியின் தலைமைப் பயிற்சியாளர் பொறுப்பை அவர் நேரடியாக ஏற்றுள்ளார்.
இது குறித்துப் பேசிய கங்குலி, "டெல்லி கேப்பிடல்ஸ் அணி எனக்கு மிகவும் நெருக்கமானது. நிர்வாகம், ஊழியர்கள் மற்றும் வீரர்களுடன் பல ஆண்டுகளாகப் பணியாற்றியுள்ளேன்".
"ஒரு வலிமையான, அச்சமற்ற அணியை உருவாக்கி புதிய பருவத்தை எதிர்கொள்ள ஆர்வமாக உள்ளேன்" என்று தெரிவித்துள்ளார்.
மாற்றங்கள்
பார்த் ஜிண்டால் வரவேற்பு
டெல்லி கேப்பிடல்ஸ் அணியின் இணை உரிமையாளர் பார்த் ஜிண்டால், கங்குலியின் இந்த நியமனத்தை வரவேற்றுப் பேசுகையில், "இந்திய கிரிக்கெட் வரலாற்றின் தலைசிறந்த கேப்டன்களில் ஒருவரான தாதா, எங்கள் அணியின் தலைமைப் பயிற்சியாளராக பொறுப்பேற்பது மிகுந்த பெருமையளிக்கிறது".
"அவரது வழிகாட்டலில் டெல்லி அணி கோப்பையை வெல்லும் தகுதியைப் பெறும்" என்று நம்பிக்கை தெரிவித்தார்.
முன்னதாக ஐபிஎல் 2026-ல் டெல்லி அணி 6-வது இடத்தையே பிடித்திருந்தது.
இதனிடையே, வரவிருக்கும் சீசனுக்காக லக்னோ சூப்பர் ஜெயண்ட்ஸ் அணியிலிருந்து ரிஷப் பண்ட்டை ரூ.15 கோடி வர்த்தக ஒப்பந்தம் மூலம் டெல்லி அணி மீண்டும் தன்வசப்படுத்தியுள்ளது.
அதேவேளையில் சுழற்பந்து வீச்சாளர் குல்தீப் யாதவ் ரூ.13.50 கோடிக்கு லக்னோ அணிக்கு மாற்றப்பட்டுள்ளதும் குறிப்பிடத்தக்கது.