துப்பாக்கி சுடுதல் உலக சாம்பியன்ஷிப்: வெண்கலம் வென்று 2028 லாஸ் ஏஞ்சல்ஸ் ஒலிம்பிக் போட்டிக்கு தகுதி பெற்றார் நீரஜ் குமார்
செய்தி முன்னோட்டம்
சர்வதேச துப்பாக்கிச் சுடுதல் விளையாட்டு கூட்டமைப்பு (ISSF) நடத்தும் உலக சாம்பியன்ஷிப் தொடரின் ஆடவர் 50 மீட்டர் ரைபிள் 3 பொசிஷன்ஸ் பிரிவில் இந்திய வீரர் நீரஜ் குமார் வெண்கலப் பதக்கம் வென்று அபார சாதனை படைத்துள்ளார். இந்த மகத்தான வெற்றியின் மூலம் 2028-ஆம் ஆண்டு அமெரிக்காவின் லாஸ் ஏஞ்சல்ஸ் நகரில் நடைபெறவுள்ள ஒலிம்பிக் போட்டிக்கான தகுதி ஒதுக்கீட்டையும் அவர் உறுதி செய்துள்ளார். ஆடவர் 10 மீட்டர் ஏர் பிஸ்டல் பிரிவில் ஜெய்பால் மால்வியா வெள்ளிப் பதக்கம் வென்றதைத் தொடர்ந்து, நடப்பு உலக சாம்பியன்ஷிப்பில் இந்தியா பெற்றுள்ள இரண்டாவது ஒலிம்பிக் கோட்டா இதுவாகும்.
வெள்ளி பதக்கம்
கடைசி ஷாட்டில் நழுவிய வெள்ளிப் பதக்கம்
இறுதிப் போட்டியில் மிகச் சிறப்பான ஆட்டத்தை வெளிப்படுத்திய 26 வயதான கடற்படை வீரர் நீரஜ் குமார், மொத்தம் 346.5 புள்ளிகள் குவித்து வெள்ளிப் பதக்கத்திற்கான போட்டியில் தீவிரமாக நீடித்தார்.
எனினும், அவரது 34-வது ஷாட்டில் எதிர்பாராதவிதமாக 9.4 புள்ளிகள் மட்டுமே கிடைத்ததால், ஸ்லோவாக்கியா நாட்டின் பேட்ரிக் ஜானி 10.4 அடித்து முன்னேறி வெள்ளியைக் கைப்பற்றினார்.
தனிநபர் நடுநிலை தடகள வீரரான டிமிட்ரி பிமெனோவ் 362.8 புள்ளிகளுடன் ஜூனியர் உலக சாதனை படைத்துத் தங்கம் வென்றார்.
இறுதிச் சுற்றில் பங்கேற்ற மற்றொரு இந்திய நட்சத்திர வீரரான ஐஸ்வரி பிரதாப் சிங் தோமர் 323.7 புள்ளிகளுடன் 5-வது இடத்தைப் பிடித்தார்.
அணி பிரிவு
வெண்கலம் வென்று இந்தியா அசத்தல்
தனிநபர் பிரிவில் தகுதிச் சுற்றில் 591 புள்ளிகள் குவித்து முதலிடம் பிடித்து இறுதிப் போட்டிக்கு முன்னேறிய நீரஜ் குமார், அதற்கு முன்னதாக நடைபெற்ற அணிப் பிரிவிலும் இந்தியாவுக்குப் பெருமை சேர்த்தார்.
நீரஜ் குமார் (582), ஐஸ்வரி பிரதாப் சிங் தோமர் (587) மற்றும் அகில் ஷியோரன் (582) ஆகியோர் அடங்கிய இந்திய அணி மொத்தம் 1,751 புள்ளிகள் குவித்து வெண்கலப் பதக்கத்தைக் கைப்பற்றியது.
இதில் நார்வே அணி 1,752 புள்ளிகளுடன் வெறும் 1 புள்ளி வித்தியாசத்தில் வெள்ளியையும், செக் குடியரசு அணி 1,754 புள்ளிகளுடன் தங்கப் பதக்கத்தையும் தட்டிச் சென்றன.