2026-ஆம் ஆண்டின் சிறந்த 11 வீரர்கள்: 18-வது முறையாக இடம்பிடித்து லியோனல் மெஸ்சி சாதனை
செய்தி முன்னோட்டம்
சர்வதேச தொழில்முறை கால்பந்து வீரர்கள் சம்மேளனமான பிப்ரோ (FIFPRO) சார்பில் 2026-ஆம் ஆண்டிற்கான உலகின் சிறந்த 11 வீரர்கள் கொண்ட 'உலக லெவன்' அணி தேர்வு செய்யப்பட்டது. இதில் அர்ஜென்டினாவின் கால்பந்து ஜாம்பவான் லியோனல் மெஸ்சி 18-வது முறையாக இடம்பிடித்துள்ளார். இதன் மூலம் அவர் புதிய வரலாறு படைத்துள்ளார். உலகம் முழுவதிலும் உள்ள ஆயிரக்கணக்கான தொழில்முறை கால்பந்து வீரர்கள் வாக்களித்து இந்த அணியைத் தேர்வு செய்தனர். அமெரிக்காவின் இன்டர் மியாமி கிளப் அணிக்காக 39 வயதான மெஸ்சி தற்போது விளையாடி வருகிறார். ஐரோப்பாவுக்கு வெளியே உள்ள ஒரு கிளப்பில் விளையாடி இந்த அணியில் இடம்பிடித்த முதல் வீரர் என்ற தனித்துவமான பெருமையையும் அவர் பெற்றுள்ளார்.
முன்னணி நட்சத்திரங்கள்
ஸ்பெயின் வீரர்களின் ஆதிக்கம்
இந்த ஆண்டிற்கான அணியில் உலகக் கோப்பையை வென்ற ஸ்பெயின் நாட்டைச் சேர்ந்த நட்சத்திர வீரர்களின் ஆதிக்கம் அதிகமாகக் காணப்பட்டது.
கோல்கீப்பர் டேவிட் ராயா, இளம் பின்கள வீரர் பாவ் குபார்சி, நடுகள நாயகன் ரோட்ரி மற்றும் இளம் முன்களப் புயல் லாமின் யமால் என நான்கு ஸ்பெயின் வீரர்கள் இதில் தேர்வு செய்யப்பட்டுள்ளனர்.
இவர்களுடன் பிரான்சின் கிலியன் எம்பாப்பே, நார்வேயின் கோல் மெஷின் எர்லிங் ஹாலண்ட், இங்கிலாந்தின் ஜூட் பெல்லிங்ஹாம், போர்ச்சுகலின் நூனோ மெண்டஸ், விட்டினா மற்றும் மொராக்கோவின் அஷ்ரப் ஹகிமி ஆகியோரும் வரிசை கட்டியுள்ளனர்.
ஹாரி கேன் புறக்கணிப்பு
2026 பிப்ரோ உலக லெவன் பட்டியல்
அண்மையில் உலகின் மிக உயரிய விருதான பலோன் டி'ஓர் விருதை வென்ற இங்கிலாந்து நட்சத்திர ஸ்ட்ரைக்கர் ஹாரி கேனுக்கு இந்த அணியில் இடம் கிடைக்காதது கால்பந்து விமர்சகர்கள் மத்தியில் பெரும் ஆச்சரியத்தை ஏற்படுத்தியுள்ளது.
பிப்ரோ வெளியிட்டுள்ள 2026-ஆம் ஆண்டின் சிறந்த அணியில் கோல்கீப்பராக டேவிட் ராயாவும், பின்களத்தில் குபார்சி, ஹகிமி, நூனோ மெண்டஸும்; நடுகளத்தில் பெல்லிங்ஹாம், ரோட்ரி, விட்டினாவும்; முன்கள வரிசையில் ஹாலண்ட், எம்பாப்பே, மெஸ்சி மற்றும் லாமின் யமாலும் இடம்பெற்று அணியை அலங்கரித்துள்ளனர்.