குமமோட்டோ மாஸ்டர்ஸ் பேட்மிண்டன்: 2-வது சுற்றில் ட்ரீசா ஜாலி - காயத்ரி கோபிசந்த்
செய்தி முன்னோட்டம்
ஜப்பானில் நடைபெற்று வரும் புகழ்பெற்ற பிடபிள்யூஎஃப் சூப்பர் 500 அந்தஸ்து கொண்ட குமமோட்டோ மாஸ்டர்ஸ் 2026 பேட்மிண்டன் தொடரில், இந்தியாவின் மகளிர் இரட்டையர் ஜோடியான ட்ரீசா ஜாலி மற்றும் காயத்ரி கோபிசந்த் கூட்டணி தங்களது முதல் சுற்றிலேயே அபார வெற்றி பெற்று காலிறுதிக்கு முந்தைய சுற்றுக்கு முன்னேறியுள்ளது. குமமோட்டோ மாகாண ஜிம்னாசியத்தில் நடைபெற்ற இந்த முதல் சுற்று ஆட்டத்தில், உலகத் தரவரிசையில் 20-வது இடத்தில் உள்ள இந்த இந்திய ஜோடி, தங்களை விட முன்னிலையில் 13-வது இடத்தில் இருக்கும் ஜப்பானின் ஹினாட்டா சுஸுகி - நாவோ யமகிதா இணையை 21-17, 21-14 என்ற நேர் செட் கணக்கில் 42 நிமிடங்களில் வீழ்த்தி அசத்தியது.
சவால்
போட்டியின் போக்கும் அடுத்த கட்டமும்
முதல் செட்டின் தொடக்கத்தில் 8-4 எனப் பின்தங்கிய இந்திய ஜோடி, அபாரமாக மீண்டு வந்து தொடர்ச்சியாக 7 புள்ளிகளைக் குவித்து 11-8 என முன்னிலை பெற்றது.
பின்னர் ஜப்பானிய இணையின் தீவிர சவாலை முறியடித்து முதல் செட்டைக் கைப்பற்றிய ட்ரீசா - காயத்ரி இணை, இரண்டாவது செட்டிலும் தொடக்கம் முதலே ஆதிக்கம் செலுத்தி எளிதாக ஆட்டத்தை முடிவுக்குக் கொண்டு வந்தது.
காலிறுதிக்கு முந்தைய சுற்றில், உலகின் 5-ஆம் நிலை ஜோடியான ஜப்பானின் ரின் இவானகா - கீ நகானிஷி இணையை இவர்கள் எதிர்கொள்ள உள்ளனர்.
இதற்கு முன்பு இவ்விரு அணிகளும் மோதிய ஆட்டங்களில் தலா ஒரு வெற்றியை பதிவு செய்து சமநிலையில் உள்ளன என்பது குறிப்பிடத்தக்கது.
முன்னேற்றம்
ஆடவர் இரட்டையர் அடுத்த சுற்று
ஆடவர் இரட்டையர் பிரிவில் இந்தியாவின் ஹரிஹரன் அம்சகருணன் - எம்.ஆர். அர்ஜுன் ஜோடி தங்களது ஆட்டத்தில் 11-6 என்ற கணக்கில் முன்னிலையில் இருந்தபோது, மலேசியாவின் 3-ஆம் நிலை ஜோடியான ஆரோன் சியா - சோ வூய் யிக் காயம் காரணமாகப் போட்டியிலிருந்து பாதியிலேயே விலகினர். இதனால் இந்திய அணி அடுத்த சுற்றுக்கு முன்னேறியது.
இதற்கிடையே, நட்சத்திர ஜோடியான சாத்விக்சாய்ராஜ் ரங்கிரெட்டி - சிராக் ஷெட்டி மற்றும் மகளிர் ஒற்றையர் பிரிவின் மாளவிகா பன்சோத் ஆகியோர் இத்தொடரிலிருந்து திடீரென விலகியுள்ளனர்.
கலப்பு இரட்டையர் தகுதிச் சுற்றில் துருவ் கபிலா - ராதிகா சர்மா இணை தோல்வியடைந்த நிலையில், நட்சத்திர வீரர் லக்சயா சென் புதன்கிழமை தனது முதல் சுற்றில் களமிறங்க உள்ளார்.