ஐபிஎல்லில் வேகமாக 100 விக்கெட்டுகளை எடுத்த இரண்டாவது வீரர் : ஹர்ஷல் படேல் சாதனை
எல்எஸ்ஜிக்கு எதிரான ஆட்டத்தில் ஆர்சிபி வேகப்பந்து வீச்சாளர் ஹர்ஷல் படேல் ஐபிஎல்லில் தனது 100வது விக்கெட்டை வீழ்த்தினார். ஆட்டத்தின் கடைசி ஓவரில் மார்க் வுட்டை அவுட்டாக்கியபோது அவர் இந்த மைல்கல்லை எட்டினார். மேலும் ஐபிஎல்லில் வேகமாக 100 விக்கெட்டுகளை வீழ்த்திய இரண்டாவது வீரர் என்ற சாதனையை படைத்துள்ளார். ஹர்ஷல் தனது முதல் ஓவரில் 17 ரன்களை விட்டுக்கொடுத்ததால், அவரது தொடக்கம் மிக மோசமானதாக இருந்தது. பின்னர் நிக்கோலஸ் பூரன் மற்றும் ஆயுஷ் படோனிக்கு எதிராக மேலும் 18 ரன்கள் விட்டுக்கொடுத்தார். ஹர்ஷல் மூன்றாவது ஓவரில் ஒன்பது ரன்கள் விட்டுக்கொடுத்தார். கடைசி ஓவரில் மார்க் வுட் மற்றும் ஜெய்தேவ் உனட்கட் ஆகியோரின் விக்கெட்டுகளை எடுத்தார். ஆனால் இந்த போட்டியில் ஆர்சிபி தோல்வியையே தழுவியது.
ஐபிஎல்லில் வேகமாக 100 விக்கெட்டுகளை வீழ்த்திய வீரர்கள்
70 ஐபிஎல் போட்டிகளில் 100 விக்கெட்டுகளை வீழ்த்தி லசித் மலிங்கா முதலிடத்தில் உள்ளார். இவருக்கு அடுத்தபடியாக புவனேஷ்வர் குமார் 81 போட்டிகளில் இந்த விக்கெட்டுகளை எட்டி இரண்டாவது இடத்தில் உள்ள நிலையில், ஹர்ஷலும் 81 போட்டிகளில் மைல்கல்லை எட்டி புவனேஷ்வர் குமாரின் சாதனையை சமன் செய்தார். இன்னிங்ஸைப் பொறுத்தவரை, ஹர்ஷல் 79 இன்னிங்ஸ்களில் மிக வேகமாக இந்த மைல்கல்லை எட்டிய இந்திய வீரர் ஆனார். ஹர்ஷல் தற்போது 81 ஐபிஎல் போட்டிகளில் 23.23 சராசரியில் 101 விக்கெட்டுகளை வீழ்த்தியுள்ளார். 69 போட்டிகளில் 22.12 சராசரியில் 89 விக்கெட்டுகளுடன் ஆர்சிபிக்காக அதிக விக்கெட் எடுத்த இரண்டாவது வீரர் ஆனார். இதில் யுஸ்வேந்திர சாஹல் 139 விக்கெட்டுகளுடன் முதலிடத்தில் உள்ளார்.
