IND vs AUS: இந்தூரில் நடைபெறும் இன்றைய ஒருநாள் போட்டி எப்படி இருக்கும்?
செய்தி முன்னோட்டம்
கடந்த செப்டம்பர் 17ம் தேதி நடைபெற்ற ஆசிய கோப்பைத் கிரிக்கெட் தொடரின் இறுதிப் போட்டியில் இலங்கையை வீழ்த்தி கோப்பையை கைப்பற்றியது இந்தியா. அதனைத் தொடர்ந்து, உலக கோப்பைத் தொடருக்கு முன்பாக, ஆஸ்திரேலியாவுடன் மூன்று போட்டிகள் கொண்ட ஒருநாள் தொடரில் விளையாடி வருகிறது இந்திய அணி.
ஆஸ்திரேலியாவுக்கு எதிராக கடந்த செப்டம்பர் 22ம் தேதி நடைபெற்ற முதல் ஒருநாள் போட்டியில் சிரமமின்றி ஆஸ்திரேலியாவை வெற்றி கொண்டது கே.எல்.ராகுல் தலைமையிலான இளம் இந்தியப் படை.
அதனைத் தொடர்ந்து, இன்று இரண்டாவது ஒருநாள் போட்டியில் பலப்பரீட்சை செய்யவிருக்கின்றன இந்தியாவும் ஆஸ்திரேலியாவும்.
இன்றைய போட்டியை வென்று தொடரை வெல்லும் முனைப்பில் இருக்கிறது இந்தியா. ஒருநாள் போட்டிகளில் தொடர்ந்து நான்கு தோல்விகளைச் சந்தித்திருக்கும் ஆஸ்திரேலியா அதனை இன்று மாற்ற போராடவிருக்கிறது.
கிரிக்கெட்
இன்றைய போட்டி எப்படி இருக்கும்?
இந்தியா மற்றும் ஆஸ்திரேலிய அணிகளுக்கு இடையிலான இன்றைய இரண்டாவது ஒருநாள் போட்டியானது, இந்தூரில் உள்ள ஹோல்கர் மைதானத்தில் நடைபெறவிருக்கிறது.
இந்த மைதானம் பேட்டர்களுக்கே சாதகமாக இருக்கும் என எதிர்பார்க்கப்படும் நிலையில், 300க்கும் மேற்பட்ட ஸ்கோரே சராசரியான ஸ்கோராக இருக்கும் என எதிர்பார்க்கப்படுகிறது.
மேலும், இந்த மைதானத்தில் டாஸ் வெல்லும் கேப்டன் முதல் பந்து வீச்சையே தேர்வு செய்ய அதிக வாய்ப்புகள் இருக்கிறது. இடைப்பட்ட ஓவர்களில் இந்த பிட்ச்சானது ஸ்பின்னுக்கு சற்று சாதகமாக இருக்கும் எனவும் கூறப்படுகிறது.
முதல் ஒருநாள் போட்டியானது மழையால் சற்று தடைப்பட்ட நிலையில், இன்றையே போட்டியில் மழை குறுக்கிடும் வாய்ப்புகள் குறைவாக இருப்பதாகவே வானிலை ஆய்வுகள் தெரிவிக்கின்றன.