மனைவியை இரண்டாவது முறையாக திருமணம் செய்யும் ஹர்திக் பாண்டியா!!
செய்தி முன்னோட்டம்
இந்திய கிரிக்கெட் அணியின் வேகப்பந்து வீச்சு ஆல்ரவுண்டரும், டி20 அணியின் கேப்டனுமான ஹர்திக் பாண்டியா தனது மனைவியான நடாசா ஸ்டான்கோவிச்சை மீண்டும் திருமணம் செய்து கொள்ள உள்ளார். இந்த ஜோடி 2020 இல் பதிவுத் திருமணம் செய்த நிலையில், அப்போது இருந்த கொரோனா கட்டுப்பாடுகள் காரணமாக பிரமாண்டமான முறையில் திருமணம் நடத்த முடியவில்லை. இது இருவருக்குமே வருத்தத்தை கொடுத்த நிலையில், தற்போது உதய்பூரில் மிகவும் ஆடம்பரமான திருமண விழாவை நடத்துகின்றனர். இரண்டாவது திருமணத்திற்கான தேதியை காதலர் தினத்தை மையப்படுத்தி தேர்ந்தெடுத்துள்ளனர். திருமணத்திற்கான ஆரம்பகட்ட சடங்குகள் திங்களன்றே (பிப்ரவரி 13) தொடங்கிவிட்ட நிலையில், பிப்ரவரி 16 வரை திருமண விழா நடைபெற உள்ளது.
ஹர்திக் பாண்டியா
ஹர்திக் பாண்டியா-நடாசா ஸ்டான்கோவிச் முதல் திருமணம்
செர்பிய நாட்டைச் சேர்ந்த நடாசா ஸ்டான்கோவிச் 2012 முதல் இந்தியாவில் வசித்து வருவதோடு மாடலாகவும் இருந்து வருகிறார். மேலும் சத்யாகிரகா உள்ளிட்ட சில பாலிவுட் படங்களிலும் நடித்துள்ளார். எனினும் 2014 பிக் பாஸ் நிகழ்ச்சியின் பங்கேற்றதன் மூலமே மக்கள் மத்தியில் பிரபலமானார். ஹர்திக்கும், நடாசாவும் காதலித்து வந்த நிலையில் 2020 புத்தாண்டில் துபாயில் ஒரு கப்பலில் வைத்து நிச்சயதார்த்தம் செய்து கொண்டனர். மேலும் கொரோனா உச்சத்தில் இருந்த 2020 மே மாதத்தில் இருவரும் மிகவும் எளிமையாக திருமணத்தை நடத்தி முடித்தனர். அதன் பிறகு அதே ஆண்டின் ஜூலை மாதத்தில் அகஸ்தியா என்ற ஆண் குழந்தையை பெற்றெடுத்தது குறிப்பிடத்தக்கது.