ஆஸ்திரேலிய நட்சத்திர கிரிக்கெட் வீரர் கிளென் மேக்ஸ்வெல் சர்வதேச போட்டிகளிலிருந்து ஓய்வு
செய்தி முன்னோட்டம்
ஆஸ்திரேலிய கிரிக்கெட் அணியின் முன்னணி நட்சத்திர ஆல்ரவுண்டர் கிளென் மேக்ஸ்வெல் (38), தனது 14 ஆண்டுகால சர்வதேச கிரிக்கெட் வாழ்க்கையிலிருந்து ஓய்வு பெறுவதாக அதிகாரப்பூர்வமாக அறிவித்துள்ளார். கடந்த 2026 பிப்ரவரியில் நடைபெற்ற டி20 உலகக்கோப்பை தொடரில் மிட்செல் மார்ஷ் தலைமையிலான ஆஸ்திரேலிய அணியில் விளையாடியதே மேக்ஸ்வெல்லின் கடைசி சர்வதேசப் போட்டியாகும். கடந்த 2012-ஆம் ஆண்டு ஆஸ்திரேலிய அணிக்காக ஒருநாள் மற்றும் டி20 போட்டிகளில் அறிமுகமான மேக்ஸ்வெல், 2013-இல் டெஸ்ட் போட்டியில் அறிமுகமானார். ஆஸ்திரேலிய அணிக்காக 7 டெஸ்ட், 149 ஒருநாள் (ODI) மற்றும் 130 டி20 (T20I) போட்டிகளில் விளையாடியுள்ளார். முன்னதாக 2025 சாம்பியன்ஸ் டிராபி தொடருடன் ஒருநாள் கிரிக்கெட்டிலிருந்து ஓய்வு பெற்றார்.
கிரிக்கெட் பயணம்
மேக்ஸ்வெல்லின் மகத்தான கிரிக்கெட் பயணம்
ஆஸ்திரேலியா சாம்பியன் பட்டம் வென்ற 2015, 2023 ஒருநாள் உலகக்கோப்பை மற்றும் 2021 டி20 உலகக்கோப்பை தொடர்களில் மேக்ஸ்வெல் முக்கிய பங்கு வகித்தார்.
குறிப்பாக 2021 மற்றும் 2023 உலகக்கோப்பை இறுதிப்போட்டிகளில் வெற்றிக்குரிய வெற்றிகரமான ரன்களை இவரே அடித்தார்.
2023 உலகக்கோப்பையில் மும்பை வான்கடே மைதானத்தில் ஆப்கானிஸ்தானுக்கு எதிராக 198 பந்துகளில் 201* ரன்கள் குவித்து, ஆஸ்திரேலியாவை தனிநபராய் வெற்றிபெற வைத்தது இவரது கிரிக்கெட் வாழ்வின் உச்சகட்ட சாதனையாகக் கருதப்படுகிறது.
ஓய்வு
ஓய்வு முடிவுக்கான காரணம் குறித்து மேக்ஸ்வெல் பேச்சு
'Final Word' பாட்காஸ்ட் நிகழ்ச்சியில் தனது ஓய்வு முடிவை அறிவித்த மேக்ஸ்வெல், அணி நிர்வாகத்தின் அழுத்தத்தால் இந்த முடிவை எடுக்கவில்லை என்றும், 2028 ஒலிம்பிக் தொடரைக் கருத்தில் கொண்டு இளம் வீரர்களுக்கு வாய்ப்பளிக்கவே விலகுவதாகவும் தெரிவித்துள்ளார்.
"ஆஸ்திரேலிய அணி நிர்வாகத்துடன் விரிவாகப் பேசினேன். மெல்போர்ன் கிரிக்கெட் மைதானத்தில் ஒரு விடைபெறும் போட்டியில் விளையாட ஆசை இருந்தது. இருப்பினும், அணியின் எதிர்கால நலன் கருதி இளம் வீரர்களுக்கு வாய்ப்பளிக்கும் அவர்களின் முடிவை நான் முழுமையாகப் புரிந்துகொள்கிறேன்," என மேக்ஸ்வெல் கூறியுள்ளார்.
மேலும், விக்டோரியா மாநில அணிக்காக முதல்தர மற்றும் 50-ஓவர் உள்நாட்டுப் போட்டிகளில் விளையாடுவதையும் கைவிடுவதாகவும், இனி பிக் பேஷ் லீக் போன்ற பிராஞ்சைசி டி20 தொடர்களில் மட்டுமே தொடர்ந்து விளையாடவுள்ளதாகவும் அவர் தெளிவுபடுத்தியுள்ளார்.