கிரிக்கெட்டை புறக்கணித்த ரசிகர்கள்: டர்பனில் உள்ளூர் கால்பந்துக்கு அலைமோதிய கூட்டம்
செய்தி முன்னோட்டம்
தென்னாப்பிரிக்காவின் டர்பன் கிங்ஸ்மீட் மைதானத்தில் நடைபெற்ற ஆஸ்திரேலிய அணிக்கு எதிரான டெஸ்ட் போட்டி, பார்வையாளர்களின் வருகையின்றி வெறிச்சோடியது கிரிக்கெட் உலகை உலுக்கியுள்ளது. ஐந்து நாள் கொண்ட டெஸ்ட் போட்டி முழுவதும் சேர்த்து மொத்தமாகவே 15,000 முதல் 20,000 பார்வையாளர்கள் மட்டுமே நேரில் பார்த்த நிலையில், அதே நாளில் நடந்து சென்று எட்டிவிடக்கூடிய தூரத்திலுள்ள மைதானத்தில் நடைபெற்ற உள்நாட்டு கால்பந்து இறுதிப்போட்டிக்கு 50,000-க்கும் மேற்பட்ட ரசிகர்கள் அலைகடலெனத் திரண்டது டெஸ்ட் கிரிக்கெட்டின் எதிர்காலம் குறித்த பெரும் கேள்விகளை எழுப்பியுள்ளது.
பாதுகாப்பு அச்சம்
பொருளாதார நெருக்கடி
டர்பன் டெஸ்ட் போட்டிக்கு ரசிகர்கள் வராததற்குப் பல்வேறு காரணங்கள் முன்வைக்கப்படுகின்றன. டர்பன் வர்த்தகப் பகுதியில் நிலவிய குடியேற்ற எதிர்ப்புப் போராட்டங்கள் காரணமாகப் பலத்த பாதுகாப்புப் படையினர் குவிக்கப்பட்டிருந்ததும், கடுமையான கெடுபிடிகளும் பொதுமக்களிடையே அச்சத்தை ஏற்படுத்தின.
மேலும், தென்னாப்பிரிக்காவில் ஏற்பட்டுள்ள கடுமையான பொருளாதார மந்தநிலை மற்றும் வரலாறு காணாத பெட்ரோல் விலை உயர்வு ஆகியவை மக்களை மைதானத்திற்குள் வருவதிலிருந்து பின்வாங்கச் செய்துள்ளன.
ஆனால், இவற்றுக்கு மத்தியில் அதே வார இறுதியில் நடைபெற்ற கால்பந்து போட்டிக்குக் கட்டுக்கடங்காத கூட்டம் வந்ததே கிரிக்கெட் உலகை ஆச்சரியத்தில் ஆழ்த்தியுள்ளது.
விமர்சனம்
கால்பந்து மோகம்
கிங்ஸ்மீட் அருகே மோசஸ் மபிடா மைதானத்தில் நடந்த MTN8 கால்பந்து இறுதிப்போட்டியில், டர்பன் நகரத்தைச் சாராத ஆர்லாண்டோ பைரேட்ஸ், மேம்லோடி சண்டவுன்ஸ் அணிகள் மோதியபோதும் 50,000 ரசிகர்கள் திரண்டனர்.
இதுபற்றிக் கூறிய முன்னாள் தென்னாப்பிரிக்க வீரர் டேரில் கலினன், "தங்கள் விருப்பமான விளையாட்டுக்காகப் பயணிக்கவும் செலவிடவும் மக்கள் தயாராக உள்ளனர்".
"ஆனால் அத்தகைய ஆர்வத்தைப் பெரும்பான்மை மக்களிடம் உருவாக்கத் தவறியது குறித்து கிரிக்கெட் வாரியம் சுயபரிசோதனை செய்ய வேண்டும்" என்று சாடியுள்ளார்.
தென்னாப்பிரிக்க வாரியமும் சர்வதேச கிரிக்கெட் கவுன்சிலும் (ICC) டெஸ்ட் போட்டிகளை மீட்டெடுக்க உடனடியாகச் செயல்பட வேண்டிய கட்டாயத்தை இது காட்டுகிறது.