பாகிஸ்தான் கிரிக்கெட் அணி இயக்குனரை பங்கம் பண்ணிய ஆஸ்திரேலிய கேப்டன்
பாக்சிங் டே டெஸ்டில் பாகிஸ்தான் தோல்வியடைந்தாலும் சிறந்த கிரிக்கெட்டை விளையாடியதாக கூறிய பாகிஸ்தான் கிரிக்கெட் அணியின் இயக்குனர் முகமது ஹபீஸுக்கு ஆஸ்திரேலிய கேப்டன் பாட் கம்மின்ஸ் சரியான பதிலடி கொடுத்தார். முன்னதாக, முகமது ஹபீஸ் போட்டிக்கு பிந்தைய செய்தியாளர் சந்திப்பில், "நாங்கள் ஒரு அணியாக சிறப்பாக கிரிக்கெட் விளையாடினோம். அதில் நான் பெருமைப்படுகிறேன். இந்த ஆட்டத்தை சிறந்த தாக்குதல் முறையில் எதிர்கொண்ட விதம் மற்ற அணிகளை விட சிறப்பாக இருந்தது. ஆனால், நாங்கள் சில தவறுகளைச் செய்தோம், அது எங்களுக்கு ஆட்டத்தை இழக்கச் செய்தது." என்று கூறினார்.
பாட் கம்மின்ஸ் நக்கல் பதில்
முகமது ஹபீஸ் கூறியது குறித்து, "ஆமாம், அவர்கள் நன்றாக விளையாடினார்கள்." என்று நக்கலாக சிரித்துக் கொண்டே ஆஸ்திரேலிய கிரிக்கெட் அணியின் கேப்டன் பாட் கம்மின்ஸ் பதில் அளித்தார். மேலும், எந்த அணி சிறப்பாக விளையாடியது என்ற விவாதத்தை முடித்து வைக்கும் வகையில், "யார் சிறப்பான விளையாடினார்கள் என்பதைப் பொறுத்தவரை, இறுதியில் வெற்றி பெறும் அணி தான்" என்று கூறினார். பாக்சிங் டே டெஸ்டில் ஆஸ்திரேலியா 79 ரன்கள் வித்தியாசத்தில் வெற்றி பெற்று தொடரில் 2-0 என முன்னிலை பெற்றதை அடுத்து பாட் கம்மின்ஸ் இதைத் தெரிவித்தார். இதற்கிடையே, போட்டியில் தோற்றதால் விரக்தியில் இருந்த ஹபீஸ், டிஆர்எஸ் முறையை கிரிக்கெட்டின் சாபம் என்று விமர்சித்தார்.
