விண்வெளி வரலாற்றில் புதிய மைல்கல்! 20 ஸ்டார்லிங்க் செயற்கைக்கோள்களுடன் விண்ணில் பாய்ந்த ஸ்டார்ஷிப்! இந்தியப் பெருங்கடலில் வெற்றிகரமாகத் தரை இறங்கியது
செய்தி முன்னோட்டம்
எலான் மஸ்க்கின் ஸ்பேஸ்எக்ஸ் நிறுவனம் தயாரித்துள்ள உலகின் மிகப்பெரிய மற்றும் மிகவும் சக்திவாய்ந்த ஸ்டார்ஷிப் ராக்கெட்டின் 13வது சோதனை முயற்சி வெற்றிகரமாக நடத்தப்பட்டுள்ளது. அமெரிக்காவின் டெக்சாஸ் மாநிலத்தில் உள்ள போகா சிகா ஏவுதளத்தில் இருந்து சனிக்கிழமை அதிகாலை விண்ணில் ஏவப்பட்ட இந்த ராக்கெட், விண்வெளிப் பயணத்தில் தனது மிக முக்கியமான சோதனைக் கட்டங்களை வெற்றிகரமாகக் கடந்து வரலாற்று சாதனை படைத்துள்ளது.
பூஸ்டர்
பூமிக்குத் திரும்பிய பூஸ்டர் மற்றும் விண்கலம்
ராக்கெட் விண்ணில் பாய்ந்த 2 நிமிடங்களுக்குப் பிறகு, அதன் கீழ் பகுதியான சூப்பர் ஹெவி பூஸ்டர் முதன்மை விண்கலத்தில் இருந்து தனியாகப் பிரிந்தது.
இந்த பூஸ்டர் பாகம் மெக்சிகோ வளைகுடா கடற்பகுதியில் திட்டமிட்டபடி தரையிறக்கப்பட்டது.
அதேவேளையில், மேல் பகுதியான ஸ்டார்ஷிப் விண்கலம் விண்வெளியில் தனது பயணத்தைத் தொடர்ந்து, நிர்ணயிக்கப்பட்ட இலக்குகளை அடைந்த பிறகு, புவியின் வளிமண்டலத்திற்குள் நுழைந்து இந்தியப் பெருங்கடலில் வெற்றிகரமாகத் தரை இறங்கியது.
செயற்கைக்கோள்கள்
விண்வெளியில் 20 செயற்கைக்கோள்கள் நிலைநிறுத்தம்
முந்தைய சோதனை முயற்சிகளைப் போலன்றி, இந்த 13வது சோதனையில் முதன்முறையாக 20 புதிய தலைமுறை ஸ்டார்லிங்க் வெர்ஷன் 3 இணைய செயற்கைக்கோள்கள் விண்வெளிக்கு எடுத்துச் செல்லப்பட்டன.
விண்வெளியில் மிதக்கும் நிலையிலேயே இந்தச் செயற்கைக்கோள்கள் வெற்றிகரமாக வெளிப்படுத்தப்பட்டு, அவற்றின் சூரியஒளித் தகடுகள் மற்றும் லேசர் தொடர்புகள் சோதனை செய்யப்பட்டன.
எதிர்கால வர்த்தக ரீதியான விண்வெளிப் பயணங்களுக்கு இது மிக முக்கியமான மைல்கல்லாகப் பார்க்கப்படுகிறது.
அடித்தளம்
நிலவு மற்றும் செவ்வாய் பயணங்களுக்கான அடித்தளம்
நாசாவின் ஆர்டெமிஸ் 3 திட்டத்தின் மூலம் மனிதர்களை மீண்டும் நிலவுக்கு அனுப்பவும், எதிர்காலத்தில் செவ்வாய் கிரகத்திற்கு செல்லவும் ஸ்டார்ஷிப் விண்கலமே பயன்படுத்தப்படவுள்ளது.
மீண்டும் மீண்டும் முழுமையாகப் பயன்படுத்தக்கூடிய வகையில் வடிவமைக்கப்பட்டு வரும் இந்த ராக்கெட், விண்வெளிப் பயண செலவுகளைப் பெருமளவில் குறைக்கும்.
இந்த 13வது சோதனையின் வெற்றியைத் தொடர்ந்து, பெறப்பட்ட தரவுகளைக் கொண்டு அடுத்தகட்ட விண்வெளிப் பயணங்களுக்கான பணிகளைப் ஸ்பேஸ்எக்ஸ் தீவிரப்படுத்தியுள்ளது.