மொபைல் குறுஞ்செய்தி சேவையில் உள்ள பாதுகாப்புக் குறைபாட்டைக் கண்டறிந்த அமெரிக்க ஆராய்ச்சி மாணவர்கள்
செய்தி முன்னோட்டம்
ஸ்மார்ட்போன் குறுஞ்செய்தி வசதியில், பயனர்களுக்கு ஹேக்கர்கள் பாதிப்பை ஏற்படுத்தும் வகையிலான குறைபாடு ஒன்று இருப்பதை ஆராய்ச்சி மாணவர் குழு ஒன்று கண்டறிந்திருக்கிறது.
அதாவது குறுஞ்செய்தி சேவையில் உள்ள ஒரு அம்சத்தை வைத்து வெறும் மொபைல் எண்ணை மட்டும் கொண்டு ஒருவரது இருப்பிடத்தைக் கண்டறிய முடியும் என்பதைக் கண்டறிந்திருக்கின்றனர்.
அமெரிக்காவின் வடகிழக்குப் பல்கலைக்கழகத்தைச் சேர்ந்த இவாஞ்சிலோஸ் பிட்சிகாஸ் என்ற ஆராய்ச்சி மாணவர் தலைமையிலான குழு இந்த குறைபாட்டைக் கண்டறிந்திருக்கிறது. ஆனால், இதுவரை இந்தக் குறைபாட்டைப் பயன்படுத்தி எந்த விதமான மோசடிச் செயல்களும் அரங்கேறவில்லை.
1990-களில் இருந்தே மொபைல்களில் குறுஞ்செய்தி சேவை வழங்கப்பட்டு வருகிறது. முப்பது ஆண்டுகளுக்கு முன்பு 2G அறிமுகப்படுத்தப்பட்ட பிறகு, குறுஞ்செய்தி சேவையை பயனுள்ளதாகவும் பாதுகாப்பானதாக மாற்ற பல்வேறு தொழில்நுட்பங்கள் கொண்டு வரப்பட்டன.
தொழில்நுட்பம்
ஸ்மார்ட்போன் குறுஞ்செய்தி சேவையில் உள்ள குறைபாடு:
புதிதாகக் கொண்டுவரப்பட்ட வசதிகளில் ஒன்று, நாம் ஒருவருக்கு அனுப்பிய குறுஞ்செய்தி சென்று சேர்ந்துவிட்டதா இல்லையா என்பதை அனுப்பியருக்கு தகவல் தெரிவிக்கும் வசதி.
இந்தத் தகவல் தெரிவிக்கும் முறையைக் கொண்டு ஒருவரது இருப்பிடத்தைக் கண்டறிய முடியும் என்பதைக் கண்டறிந்திருக்கிறது மேற்கூறிய அமெரிக்க ஆராய்ச்சி மாணவர்கள் குழு.
ஒரு மொபைல் எண்ணுக்கு தொடர்ச்சியாக பல்வேறு குறுஞ்செய்திகளை அனுப்பி, அது சென்று சேர்ந்து விட்டதா என்று அனுப்பியவர் பெறும் தகவல் எவ்வளவு நேரத்தில் வருகிறது என்ற தகவல்களைப் பெற்று, அதனை இயந்திரக் கற்றல் தொழில்நுட்பத்துடன் பயன்படுத்தி குறிப்பிட்ட நபர் எந்த இடத்தில் இருக்கிறார் என்பதைக் கண்டறிய முடியுமாம்.
குறுஞ்செய்திகள் என்கிரிப்ட் செய்யப்பட்டிருந்தாலும் இந்த முறையைப் பயன்படுத்தி இருப்பிடத்தைத் தெரிந்து கொள்ள முடியும் எனத் தெரிவித்திருக்கிறார்கள்.