ஆரக்கிள் மீண்டும் பணிநீக்கம்: இந்தியாவில் 3,000 பேருக்கு வேலை இழப்பு; இழப்பீடு மற்றும் விதிகள்
செய்தி முன்னோட்டம்
முன்னணி சர்வதேச மென்பொருள் நிறுவனமான ஆரக்கிள், உலகளவில் தனது ஊழியர்களை பணிநீக்கம் செய்யும் அடுத்தகட்ட நடவடிக்கையை தீவிரப்படுத்தியுள்ளது. இதில் இந்திய பிரிவு பெருமளவில் பாதிக்கப்பட்டுள்ளதாக தகவல்கள் தெரிவிக்கின்றன. சுமார் 3,000 இந்திய ஊழியர்கள் இப்புதிய பணிநீக்க நடவடிக்கையால் பாதிக்கப்பட வாய்ப்புள்ளதாகக் கூறப்படுகிறது. இருப்பினும், இது குறித்து ஆரக்கிள் நிறுவனம் அதிகாரப்பூர்வமாக இதுவரை எந்த அறிவிப்பும் வெளியிடவோ, கேள்விகளுக்கு பதிலளிக்கவோ இல்லை.
இழப்பீடு
அதிகபட்சமாக 26 வார அடிப்படை சம்பளம் இழப்பீடு
பணிநீக்கம் செய்யப்படும் ஊழியர்களுக்கான இழப்பீட்டுத் திட்டத்தை ஆரக்கிள் வெளியிட்டுள்ளது.
அதன்படி, முதல் ஒரு வருட பணிக்கு 4 வார அடிப்படை சம்பளமும், அடுத்தடுத்த ஒவ்வொரு வருட பணிக்கும் தலா 1 வார சம்பளமும் இழப்பீடாக வழங்கப்பட உள்ளது.
ஆனால், ஊழியர் எவ்வளவு ஆண்டுகள் பணிபுரிந்திருந்தாலும், இந்த இழப்பீட்டுத் தொகை அதிகபட்சமாக 26 வார அடிப்படை சம்பளத்தை (6 மாத சம்பளம்) விட மிகாமல் இருக்கும் வகையில் கட்டுப்படுத்தப்பட்டுள்ளது.
விதிகள்
பங்குகளுக்கான சலுகைகள் மற்றும் போனஸ் ரத்து விதிகளின் பின்னணி
ஊழியர்களுக்கு இதுவரை வழங்கப்படாமல் நிலுவையில் உள்ள பங்குகளுக்கான உரிமைகள் அனைத்தும் பணிநீக்கத்தோடு முற்றிலும் ரத்து செய்யப்படுகின்றன.
ஏற்கனவே உரிமையாக்கப்பட்ட பங்குகளை மட்டும் ஊழியர்கள் தொடர்ந்து வைத்திருக்க முடியும்.
மேலும், நிறுவனத்தின் கார்ப்பரேட் போனஸ் திட்டங்களில் இனி இவர்கள் பங்கேற்க முடியாது.
ஆனால், விற்பனைப் பிரிவில் பணிபுரிந்த ஊழியர்களுக்கு அவர்கள் ஏற்கனவே ஈட்டிய கமிஷன் தொகைகள் மட்டும் தனியாக வழங்கப்படும்.
தற்போதைய சூழல்
இந்தியாவில் பாதிக்கப்பட்ட குழுக்கள் மற்றும் தற்போதைய சூழல்
ஆரக்கிள் ஹெல்த், கிளவுட் இன்ஃப்ராஸ்ட்ரக்சர் செக்யூரிட்டி, ஆரக்கிள் ஃபைனான்சியல் சர்வீசஸ் மற்றும் டேட்டா சென்டர் செயல்பாடுகள் உள்ளிட்ட முக்கியப் பிரிவுகளில் இந்தப் பணிநீக்கம் நடந்து வருகிறது.
புதிய பட்டதாரிகள் முதல் நடுத்தர மேலாளர்கள் வரை அனைவரும் பாதிக்கப்பட்டுள்ளனர்.
ஏற்கனவே ஏப்ரல் மாதத்தில் சுமார் 12,000 ஊழியர்கள் இந்தியாவில் பாதிக்கப்பட்ட நிலையில், தற்போது மீண்டும் 3,000 பேருக்கு வேலை இழப்பு ஏற்பட்டுள்ளது ஆரக்கிள் ஊழியர்களிடையே பெரும் அதிர்ச்சியை ஏற்படுத்தியுள்ளது.