ஆன்லைன் டேர்ம் இன்சூரன்ஸ் பாலிசி - இந்த தப்பை மட்டும் செய்யாதீங்க!
ஒவ்வொருவருக்கும் ஆயுள் காப்பீடு திட்டம் என்பது முக்கியமான ஒன்று. பல ஆயுள் காப்பீடு திட்டங்கள் உள்ளன. அதில், மிகவும் முக்கியமான பாலிசியாக 'டெர்ம் இன்சூரன்ஸ்' இருக்கிறது. இதில், குறைவான பிரீமியம் செலுத்தினால் போதும். அதிக கவரேஜ் கிடைக்கும். பாலிசிதாரர்களுக்கு ஏதாவது அசம்பாவிதம் நடக்கும் பட்சத்தில் இதனை பயன்படுத்திக்கொள்ளலாம். அப்படி இல்லை என்றால் பாலிசி முடிவில் முதிர்வு தொகை எதுவும் கிடைக்காது. அதாவது பாலிசிக்கு கட்டிய பிரீமியம் தொகை திரும்பக் கிடைக்காது. ஒருவரது ஆண்டு வருமானத்தைப்போல 15 மடங்கு தொகைக்கு டெர்ம் இன்சூரன்ஸ் எடுத்துக் கொள்ள வேண்டும்.
ஆன்லைன் பாலிசி எடுப்பவர்கள் முக்கியமாக கவனிக்கப்பட வேண்டியது
இந்த இன்சூரன்ஸை சமீப காலங்களில் ஆன்லைன் மூலமாக வாங்குவது அதிகரித்து வருகிறது. தொடர்ந்து, முகவர் மூலம் எடுக்கப்படும் பாலிசியைவிட ஆன்லைன் மூலம் எடுக்கப்படும் பாலிசிக்கான பிரீமியம் கணிசமாகக் குறைகிறது. ஆன்லைனில் பாலிசி வாங்குவது மிகவும் எளிதானது. ஆனால் அதுவே சில நேரங்களில் சிக்கலானதாக மாறலாம். மேலும், முகவரிடம் நேரடியாக விளக்கிச் சொல்லும் விஷயங்களை ஆன்லைனில் விளக்க முடியாது. ஆன்லைன் பாலிசி விண்ணப்பத்தை நாம் நிரப்பும்போது தவறுகள் நடக்கவும் வாய்ப்பு உள்ளது. அதே போன்று,பாலிசி எடுக்கும்போது நம்மைப் பற்றிய விவரங்களை தெளிவாகக் குறிப்பிட்டால் தான் கிளைம் செய்வதில் சிக்கல் இருக்காது.
