இந்தியாவின் 5G உட்கட்டமைப்பைப் புகழ்ந்த நோக்கியாவின் சிஇஓ பெக்கா லண்ட்மார்க்
செய்தி முன்னோட்டம்
இந்தியாவில் பெங்களூருவில் உள்ள தங்களுடைய உலகளாவிய ஆராய்ச்சி மற்றும் மேம்பாட்டு மையத்தில், புதிய 6G ஆய்வகத்தை அமைத்திருக்கிறது நோக்கியா நிறுவனம்.
நோக்கியாவின் இந்தப் புதிய ஆய்வகத்தை மத்திய தொலைத் தொடர்புத்துறை அமைச்சர் அஷ்வினி வைஷ்ணவ் காணொளி வாயிலாகத் திறந்து வைத்தார்.
2014ம் ஆண்டு தங்களுடைய ஸ்மார்ட்போன் வணிகத்தை விற்பனை செய்த பிறகு, தொலைத்தொடர்பு வலைப்பின்னல் உட்கட்டமைப்பு வசதிகளை மேம்படுத்தும் வணிகத்தில் கவனம் செலுத்தத் தொடங்கியது நோக்கியா.
தற்போது உலகின் முன்னணி வலைப்பின்னல் உபகரணங்களை உற்பத்தி செய்யும் நிறுவனமாக மாறியிருக்கிறது நோக்கியா. மேலும், உலகளவில் மிகவும் மேப்பட்ட தொலைத்தொடர்பு தொழில்நுட்ப மேம்பாட்டு ஆய்வகங்களையும் வைத்திருக்கிறது நோக்கியா.
6G
இந்திய 6G முன்னெடுப்பில் பங்கெடுக்கும் நோக்கியா:
இந்தியாவில் கடந்த ஆண்டு அக்டோபர் மாதத்திலிருந்து 5G வலைப்பின்னலை விரிவுபடுத்தத் தொடங்கின, இந்தியாவின் முன்னணி தொலைத்தொடர்பு நிறுவனங்களான ஜியோவும், ஏர்டெல்லும்.
கிட்டத்தட்ட பெரும்பான்மையான பெரு மற்றும் சிறு நகரங்கள் மேற்கூறிய இரு நிறுவனங்களும் 5G தொலைத்தொடர்பு சேவையை விரிவுபடுத்தியிருக்கும் நிலையில், இந்தியாவில் 6G தொழில்நுட்பத்தை மேம்படுத்தி, அதனை அனைத்து மக்களின் பயன்பாட்டிற்கும் அறிமுக்பபடுத்த 'பாரத் 6G தொலைநோக்கு'த் திட்டத்தை முன்னெடுத்து வருகிறது இந்தியா.
இந்தியாவின் இந்த திட்டத்தில் பங்கெடுக்கும் பொருட்டு தற்போது பெங்களூருவில் புதிய ஆய்வகத்தைத் திறந்திருக்கிறது நோக்கியா.
இந்த ஆய்வகத்தில் 6G தொழில்நுட்பம் மற்றும் வலைப்பின்னலை சென்சாராப் பயன்படுத்தும் தொழில்நுட்பம், உள்ளிட்ட பல்வேறு தொழில்நுட்பங்களை ஆராய்ந்து மேம்படுத்தவிருக்கிறது அந்நிறுவனம்.
நோக்கியா
இந்தியாவின் 5G உட்கட்டமைப்பு:
இந்தியாவின் நோக்கியாவின் புதிய ஆய்வகத் திறப்பினைத் தொடர்ந்து, இந்தியாவின் 5G உட்கட்டமைப்பைப் புகழ்ந்து பேசியிருக்கிறார் அந்நிறுவனத்தின் தலைமை செயல் அதிகாரியான பெக்கா லண்ட்மார்க்.
"இந்தியாவில் 5G சேவையின் பரவலாக்கம் மிகவும் ஆச்சர்யப்படுத்துகிறது. உலகளவில் மிகவும் வேகமாக பரவலாக்கப்பட்ட தொலைத்தொடர்பு வலைப்பின்னல்களில் இதுவும் ஒன்று.
மிகப்பெரிய அளவிலான 5G உட்கட்டமைப்பைக் கொண்ட நாடுகளுள் முதல் மூன்று இடங்களில் இருக்கிறது இந்தியா. மேலும், உலகின் பல்வேறு வளர்ந்த நாடுகளை விட அதிவேக 5G பதிவிறக்க வேகத்தைக் கொண்டிருக்கிறது இந்தியா" என இந்தியாவின் 5G உட்கட்டமைப்பு குறித்து தெரிவித்திருக்கிறார் அவர்.