ஆர்டெமிஸ் நிலவு திட்டத்திற்கு புதிய விண்வெளி வீரா்களைத் தேர்வு செய்கிறது நாசா: 2 ஆண்டுகளுக்குப் பின் விண்ணப்பங்கள் வரவேற்பு
செய்தி முன்னோட்டம்
நிலவில் நிரந்தர ஆராய்ச்சி மையத்தை அமைக்கும் தனது வரலாற்றுச் சிறப்புமிக்க ஆர்டெமிஸ் திட்டத்தைப் பலப்படுத்தும் நோக்கில், புதிய விண்வெளி வீரர்களை தேர்வு செய்யும் பணிகளை அமெரிக்க விண்வெளி அமைப்பான நாசா அதிகாரப்பூர்வமாகத் தொடங்கியுள்ளது. கென்னடி விண்வெளி மையத்தில் நடைபெற்ற வான்வெளி அமைப்பின் சிறப்பு நிகழ்வின் போது இந்த அறிவிப்பு வெளியிடப்பட்டது. கடந்த 2 ஆண்டுகளுக்குப் பிறகு நாசா வெளியிடும் முதல் ஆள்சேர்ப்பு அறிவிப்பு இதுவாகும்.
விளக்கம்
32 விண்வெளி வீரர்கள் மட்டுமே உள்ளனர்: நாசா
தற்போது நாசாவில் 32 தீவிரச் செயல்பாட்டில் உள்ள விண்வெளி வீரர்கள் மட்டுமே உள்ளனர்.
குறைந்த புவி வட்டப்பாதையைத் தாண்டி நிலவு மற்றும் செவ்வாய் கோள்களுக்கு மனிதர்களை அனுப்பும் திட்ட விரிவாக்கத்திற்கு இந்த எண்ணிக்கை மிகவும் குறைவாகும்.
ஆர்டெமிஸ் III விண்வெளித் திட்டத்தின் தளபதி ராண்டி ப்ரெஸ்னிக் இது குறித்துப் பேசுகையில், "எங்களிடம் இருக்கும் விண்வெளி வீரர்களின் எண்ணிக்கையை விடவும், செய்ய வேண்டிய பணிகள் மிக அதிகமாக உள்ளன. எனவே புதிய திறமையாளர்களின் தேவை நாசாவுக்கு உடனடியாக உள்ளது" என்றார்.
விவரங்கள்
தேர்வு முறை & காலக்கெடு விவரங்கள்
தகுதியுடைய நபர்கள் வரும் டிசம்பர் 3-ஆம் தேதி வரை நாசாவின் இணையதளத்தில் விண்ணப்பிக்கலாம்.
2027-ஆம் ஆண்டின் பிற்பகுதியில் தேர்வுப் பட்டியல் இறுதி செய்யப்பட்டு, தேர்ந்தெடுக்கப்படும் புதிய விண்வெளி வீரர்களுக்கு 2028-ஆம் ஆண்டின் தொடக்கத்தில் பயிற்சிகள் தொடங்கப்படும்.
விண்ணப்பதாரர்கள் அமெரிக்க குடியுரிமை பெற்றவர்களாகவும், அறிவியல்/தொழில்நுட்பத் துறையில் முறையான கல்லூரி பட்டப்படிப்பு மற்றும் பணி அனுபவம் கொண்டவர்களாகவும் இருக்க வேண்டும்.
பயிற்சி
பயிற்சியும் எதிர்கால நிலவுப் பயணமும்
தேர்ந்தெடுக்கப்படும் புதிய விண்வெளி வீரர்களுக்கு 2 ஆண்டுகள் கடினமான கட்டாயப் பயிற்சிகள் அளிக்கப்படும்.
இருப்பினும், பயிற்சி முடிந்த பின்னரும் அவர்கள் விண்வெளிக்கு செல்ல மேலும் சில ஆண்டுகள் காத்திருக்க நேரிடலாம் என ஆர்டெமிஸ் திட்டத்தின் முக்கிய விண்வெளி வீரர் பிராங்க் ரூபியோ சுட்டிக்காட்டியுள்ளார்.
இதற்கிடையே, வரும் கோடைக்காலத்தில் ஸ்பேஸ் எக்ஸ் மற்றும் புளூ ஆரிஜின் நிறுவனங்களின் லேண்டர் அமைப்புகளுடன் தங்களது விண்கலத்தை இணைக்கும் பயிற்சிப் பரிசோதனையை ராண்டி ப்ரெஸ்னிக் தலைமையிலான குழுவினர் மேற்கொள்ளவுள்ளனர்.
இது நிலவின் தென் துருவத்தில் மனிதர்களை தரையிறக்க திட்டமிட்டுள்ள ஆர்டெமிஸ் IV விண்வெளிப் பயணத்திற்கான முக்கிய முன்னோட்டப் பயிற்சியாக அமையும்.