எக்ஸை முழுமையான கட்டண சமூக வலைத்தளமாக்குகிறாரா எலான் மஸ்க்?
செய்தி முன்னோட்டம்
கடந்தாண்டு அக்டோபர் மாதம் எக்ஸ் (முன்னதாக ட்விட்டர்) நிறுவனத்தை வாங்கிய பிறகு அதில் பல்வேறு மாற்றங்களை அறிமுகப்படுத்தினார் எலான் மஸ்க். அந்த மாற்றங்களில் பெரும்பாலானவை, அந்நிறுவனத்தின் வருவாயை பெருக்குவதையே முதன்மையான நோக்கமாகக் கொண்டிருந்தன.
சில அடிப்படை வசதிகளைத் தவிர்த்து, மற்ற அனைத்து வசதிகளையும் எக்ஸின் ப்ரீமியம் கட்டண சேவையின் கீழ் கொண்டு சென்றார் எலான் மஸ்க்.
நம்மைப் பின்தொடராதவர்களுக்குக் குறுஞ்செய்திகளை அனுப்புவது முதல், நீண்ட நேரம் ஓடக்கூடிய காணொளிகளைப் பதிவிடுவது மற்றும் எக்ஸ் பதிவுகளை எடிட் செய்வது வரை பல்வேறு வசதிகளையும் கட்டண சேவையின் கீழே வைத்திருக்கிறது எக்ஸ்.
மேலும், கட்டண சேவைக்கு சந்தா செய்தவர்கள் தங்களது ட்விட்டர் கணக்கின் மூலம் வருவாய் ஈட்டவும் விளம்பர வருவாய் பகிர்வு திட்டத்தை அறிமுகப்படுத்தினார் அவர்.
எலான் மஸ்க்
முழுவதுமாக கட்டண சேவையாகும் எக்ஸ்?
இந்நிலையில், எக்ஸை முழுவதுமாக கட்டண சமூக வலைத்தளமாக மாற்றும் திட்டம் ஒன்றும் இருப்பதாக எலான் மஸ்க் கூறியிருப்பதாகத் தகவல் வெளியாகியிருக்கிறது.
இஸ்ரேல் பிரதமர் பெஞ்சமின் நேதன்யாகூவை நேற்று சந்தித்திருக்கிறார் எலான் மஸ்க். இந்த சந்திப்பின் போதே, நேதன்யாகூவிடம் மேற்கூறிய திட்டம் குறித்து எலான் மஸ்க் குறிப்பிட்டதாகக் கூறப்படுகிறது.
சமூக வலைத்தளங்களில் மக்களின் பாதுகாப்புக்கு ஊறு விளைவிக்காத வகையில், செயற்கை நுண்ணறிவுத் தொழில்நுட்பங்களின் பயன்பாட்டை அறிமுகப்படுத்துவது மற்றும் சமூக வலைத்தளங்களில் சுதந்திரப் பேச்சு என பல்வேறு விஷயங்கள் குறித்து அவர்கள் உரையாடியதாகத் தெரிவிக்கப்பட்டுள்ளது.
மேலும், எக்ஸில் சுதந்திரப் பேச்சுக்கும், வெறுப்புப் பிரச்சாரத்திற்கும் இடையேயான சமநிலையைக் கடைப்பிடிக்க எலான் மஸ்க்கிடம் நேதன்யாகூ வலியுறுத்தியதாகவும் கூறப்படுகிறது.
எக்ஸ்
எப்போது முதல் கட்டண சேவையாகிறது எக்ஸ்?
இந்த உரையாடலின் போதே, எக்ஸை முழுமையாக கட்டண சேவையாக்கும் திட்டம் குறித்து பேசியிருக்கிறார் எலான் மஸ்க்.
எக்ஸில் முக்கியமாக விவாதிக்கப்படும் பிரச்சினைகளுள் ஒன்று பாட்கள். நிஜ பயனாளர்கள் மற்றும் பாட்களுக்கு இடையேயான வேறுபாடு இல்லாதது என்ஸின் நம்பகத்தன்மையையும் சேர்த்து பாதிப்பாதகக் கூறப்படுகிறது.
எனவே, எக்ஸில் பாட்களின் ஆதிக்கத்தைக் குறைக்க, எக்ஸ் பயனர்கள் ஒவ்வொரு மாதமும் சிறிதளவு தொகையை செலுத்தும் வகையில் புதிய திட்டத்தை அமல்படுத்தத் திட்டமிட்டு வருவதாகத் தெரிவித்திருக்கிறார் எலான் மஸ்க்.
எனினும், எவ்வளவு கட்டணம், எப்போது இருந்து அமலுக்கு வரும், கண்டிப்பாக அமலுக்கு வருகிறதா உள்ளிட்ட தகவல்களை அவர் குறிப்பிடவில்லை.