AI தொழில்நுட்பங்களுக்கு புதிய கட்டுப்பாடுகளை விதித்த சீனா!
செய்தி முன்னோட்டம்
தொழில்நுட்ப உலகில் தற்போதைய பேசு பொருள் செயற்கை நுண்ணறிவு (AI) தான். ஒரு பக்கம், AI-க்களை எப்படி மேம்படுத்துவது, அடுத்த நிலைக்கு எடுத்துச் செல்வது என்பது குறித்து விவாதித்துக் கொண்டிருக்க, மறுபக்கம் AI-க்களால் ஏற்படும் பின்விளைவுகளுக்கு தகுந்த முன்னெச்சரிக்கை நடவடிக்கைகள் குறித்து யோசித்துக் கொண்டிருக்கிறார்கள்.
ஏற்கனவே, சாட்ஜிபிடி-யை இத்தாலி முழுமையாகத் தடை செய்திருக்கும் நிலையில், தங்கள் நாட்டில் AI பயன்பாட்டிற்கான கட்டுப்பாடுகளையும் விதிமுறைகளையும் தற்போது அறிவித்திருக்கிறது சீனா.
தொழில்நுட்பங்கள் மற்றும் தொழில்நுட்ப நிறுவனங்களுக்கு கட்டுப்பாடுகளை விதிப்பதில் சீனாவுக்கு நிகர் சீனா தான். AI-க்கு அந்நாடு என்னென்ன விதிமுறைகளை விதித்திருக்கிறது? பார்க்கலாம்.
செயற்கை நுண்ணறிவு
AI-க்கான விதிமுறைகள்:
AI-யால் உருவாக்கப்படும் உள்ளடக்கங்கள் சோசலிச கோட்பாடுகளுக்கு எதிராக இருக்கக்கூடாது. அவற்றை எடுத்துக் கூறும் வகையிலேயே இருக்க வேண்டும்.
சாட்ஜிபிடி போன்ற எந்த வகை AI தொழில்நுட்பத்தால் உருவாக்கப்படும் உள்ளடக்கங்களும், கருத்துக்களும், எந்த வகையிலும் அரசுக்கு எதிராக இருக்கக் கூடாது.
அவை உருவாக்கும் கருத்துக்கள் மனிதர்களின் நிறம், மதம் மற்றும் குலம் ஆகியவற்றை வைத்து பாகுபாடு காட்டும் வகையில் இருக்ககூடாது என்பதை நிறுவனங்கள் உறுதி செய்ய வேண்டும்.
தவறான மற்றும் பொய்யான செய்திகளை அல்லது கருத்துக்களை பரப்பக்கூடாது. வெளிநாடுகளைத் தவிர்த்து சீனாவில் இருக்கும் பைடு, அலிபாபா போன்ற நிறுவனங்களே AI மாடல்களை உருவாக்கி வரும் நிலையில், இந்த விதிமுறைகளை விதித்திருக்கிறது சீனா. இந்த ஆண்டு இறுதியில் இந்த விதிமுறைகள் அமலுக்கு வரலாம் எனத் தெரிவிக்கப்பட்டுள்ளது.