இந்தியாவில் ஐபோன் கேமரா தயாரிப்பிற்கான பேச்சுவார்த்தையில் இறங்கியுள்ள ஆப்பிள்
செய்தி முன்னோட்டம்
ஆப்பிள் நிறுவனம், இந்தியாவில் முக்கிய ஐபோன் உதிரிபாகங்களை, குறிப்பாக கேமரா மாட்யூல்களை தயாரிப்பதற்கான பேச்சுவார்த்தைகளின் முடிவில் இருப்பதாக கூறப்படுகிறது.
தொழில்நுட்ப நிறுவனமான டாடா குழுமத்தின் டைட்டன் நிறுவனத்துடனும், சென்னையின் முருகப்பா குழுமத்துடனும் இந்த உதிரிபாகங்களின் சாத்தியமான அசெம்பிளி மற்றும் உற்பத்திக்காக பேசிவருவதாக கூறப்படுகிறது.
ஐபோனின் கேமரா தொகுதிகளுக்காக இந்திய சப்ளையர்கள் யாரையும் இதுவரை ஆப்பிள் ஈடுபடுத்தியதில்லை. அதனால், இந்த நடவடிக்கை குறிப்பிடத்தக்க மைல்கல்லைக் குறிக்கிறது.
இந்த பேச்சுவார்த்தைகள், ஆப்பிள் அதன் 'சீனா பிளஸ் ஒன் கொள்கையை' பின்பற்றி, அதன் விநியோகச் சங்கிலி மற்றும் கூறு உற்பத்திக்காக சீனாவை மட்டுமே நம்பி இருக்கக்கூடாது என்ற பரந்த மூலோபாயத்தின் ஒரு பகுதியாகும்.
மூலோபாய மாற்றம்
சீனாவை மட்டுமே அண்டி இருக்கக்கூடாது என யோசிக்கும் ஆப்பிள்
அடுத்த சில மாதங்களுக்குள் டைட்டன் அல்லது முருகப்பா குழுமத்தினை தனது விருப்பமான பார்ட்னராக ஆப்பிள் தேர்வு செய்யும் என எதிர்பார்க்கப்படுகிறது.
டைட்டன், முருகப்பா குரூப் ஆகியவை அவற்றின் உயர் துல்லியமான உற்பத்தித் திறன்களுக்காக அறியப்படுகின்றன.
முருகப்பா குழுமம் 2022இல் Moshine Electronicsஇல் கணிசமான பங்குகளை வாங்கியதன் மூலம் எலக்ட்ரானிக்ஸ் துறையில் தனது இருப்பை விரிவுபடுத்தியது.
இதேபோல், டைட்டன் நிறுவனம் அதன் துணை நிறுவனமான டைட்டன் இன்ஜினியரிங் மற்றும் ஆட்டோமேஷன் மூலம் உலகளாவிய வாடிக்கையாளர்களுக்கு சேவை செய்வதில் வலுவான சாதனைப் பதிவை நிரூபித்துள்ளது.
உள்ளூர் உற்பத்தியானது ஆப்பிளுக்கு கணிசமான அளவு செலவுகளை கட்டுப்படுத்தும் அதே வேளையில் சீன சப்ளையர்களை சார்ந்திருப்பதை குறைக்கும்.