இந்தியாவில் அமேசான் ஏர் சரக்கு விமான சேவை தொடக்கம்! முக்கிய நோக்கம் என்ன?
செய்தி முன்னோட்டம்
வாடிக்கையாளர்களுக்கு விரைவாக டெலிவரி செய்ய இந்தியாவில் அமேசான் நிறுவனம் ஏர் சரக்கு விமான சேவையை தொடங்கியுள்ளது.
அமேசானின் இப்படி ஒரு முயற்சி இந்திய இ-காமர்ஸ் சந்தையில் பெரிய தாக்கத்தை ஏற்படுத்தும் என்று அந்நிறுவனம் தெரிவித்துள்ளது.
முதற்கட்டமாக பெங்களூரு, மும்பை, டெல்லி, ஹைதராபாத் நகரங்களுக்கான டெலிவரிகளை இது சுமந்து செல்லும்.
இச்சேவையை முதலில் வட அமெரிக்கா, ஐரோப்பாவுக்கு தொடங்கியது. அதன் பின் இந்தியாவில் தொடங்கியுள்ளது.
இதன் தொடக்க விழா ஹைதராபாத்தில் நடந்தது. தெலுங்கானா மாநில தொழில்துறை அமைச்சர் கேடி ராமா ராவ் இந்த சேவையை ராஜீவ் காந்தி சர்வதேச விமான நிலையத்தில் நடந்த நிகழ்வில் தொடங்கி வைத்தார்.
அமேசான் ஏர் சரக்கு விமானம்
அமேசான் ஏர் சரக்கு விமான சேவையையால் 4500 நெசவாளர்களின் தயாரிப்பு விற்பனைக்கு வரும்
இதுகுறித்து பேசிய அவர், இந்த அமேசான் திட்டத்தால் நிறைய கலைஞர்கள், நெசவாளர்கள் தங்களின் படைப்புகள் மற்றும் தயாரிப்புகளை நேரடியாக சர்வதேச ஆன்லைன் வணிகத் தளத்திற்கு கொண்டு சேர்க்க முடியும் என்று தான் நம்புவதாகக் கூறினார்.
மேலும், அமேசானுடன் தெலுங்கானா கைத்தறி வாரியம் பேசிவருவதாகவும், அதன் மூலம் மாநிலத்தின் 56 கிராமங்களைச் சேர்ந்த 4500 நெசவாளர்களின் தயாரிப்பு நேரடியாக இத்தளத்தின் மூலம் விற்பனைக்கு ஏற்பாடு செய்வதாகவும் தெரிவித்தார்.
இதனால், அமேசான் ஏர் சேவையின் மூலம் வாடிக்கையாளர்கள் தங்கள் ஆர்டர்களை விரைவில் பெற முடியும் எனவும் தெரிவித்தார்,
அண்மையில், அமேசான் நிறுவனத்திலிருந்து 25,000 ஊழியர்களைப் பணி நீக்கம் செய்ய உள்ளதாகவும் அறிவிக்கப்பட்டுள்ளது குறிப்பிடத்தக்கது.