பாக்கெட்டில் வெங்காயம் வைத்தால் வெயிலைத் தடுக்கலாமா?" - வைரலாகும் ஜோதிராதித்ய சிந்தியாவின் டிப்ஸ்! உண்மை என்ன?
செய்தி முன்னோட்டம்
இந்தியாவின் பல பகுதிகளில் வெயில் சதம் அடித்து வரும் நிலையில், மத்திய அமைச்சர் ஜோதிராதித்ய சிந்தியா பகிர்ந்துள்ள ஒரு சுவாரசியமான தகவல் சமூக வலைதளங்களில் விவாதத்தைக் கிளப்பியுள்ளது. 51 டிகிரி வெயிலிலும் தனது காரில் ஏசி பயன்படுத்துவதை தவிர்ப்பதாகவும், வெப்பக் காற்றிலிருந்து தப்பிக்க தனது பாக்கெட்டில் எப்போதும் ஒரு வெங்காயத்தை வைத்திருப்பதாகவும் அவர் தெரிவித்துள்ளார். சமீபத்தில் பகிரப்பட்ட வீடியோ ஒன்றில், தனது பாக்கெட்டில் இருந்த வெங்காயத்தை எடுத்துக் காட்டிய அவர்,"பாக்கெட்டில் வெங்காயத்தை வைத்திருங்கள், வெயிலிலிருந்து பாதுகாப்பாக இருங்கள்" எனக் கூறியுள்ளார். இது காலம் காலமாக இந்தியாவில் நிலவி வரும் ஒரு நம்பிக்கையை மீண்டும் நினைவூட்டியுள்ளது. வெங்காயத்தைச் சாப்பிடுவதற்கும், அதை வெறும் பாக்கெட்டில் வைத்திருப்பதற்கும் நிறைய வித்தியாசங்கள் உள்ளன என மருத்துவ நிபுணர்கள் விளக்குகிறார்கள்.
ட்விட்டர் அஞ்சல்
Twitter Post
आधुनिक युग में सब ‘डब्बे’ लेकर घूम रहे हैं और संचार मंत्री… pic.twitter.com/K41QYKlDeq
— Jyotiraditya M. Scindia (@JM_Scindia) April 26, 2026
அறிவியல் பார்வை
வெங்காயம் உண்மையில் வெயிலைத் தடுக்குமா?
1. உணவில் வெங்காயம்: கோடைகாலத்தில் வெங்காயத்தை உணவில் சேர்த்துக் கொள்வது ஆரோக்கியமானது. ஏனெனில், வெங்காயத்தில் அதிகப்படியான நீர்ச்சத்து உள்ளது. இதில் உள்ள குவெர்செடின் (Quercetin) போன்ற ஆன்டி-ஆக்ஸிடன்ட்கள் உடல் சூட்டைத் தணிக்க உதவும். கோடையில் ஏற்படும் செரிமானக் கோளாறுகளைச் சரிசெய்ய வெங்காயம் உதவுகிறது. 2. பாக்கெட்டில் வெங்காயம்(நம்பிக்கை vs அறிவியல்): பாக்கெட்டில் வெங்காயத்தை வைத்திருந்தால் அது வெப்பக் காற்றை உறிஞ்சிக் கொள்ளும் என்பது ஒரு நம்பிக்கை மட்டுமே. ஒரு வெங்காயத்தைச் சட்டைப் பையில் வைத்திருப்பதன் மூலம் உடல் வெப்பநிலையைச் சீராக வைத்திருக்க முடியும் என்பதற்கு எந்தவிதமான அறிவியல் ஆதாரமும் இல்லை. உடலின் உட்புற வெப்பநிலையைச் சமநிலைப்படுத்த முடியாத போதுதான் வெப்பத்தாக்கு (HeatStroke) ஏற்படுகிறது. இதற்கு வெளிப்புறத்தில் வைக்கும் வெங்காயம் எவ்விதத் தீர்வையும் தராது.
தீர்வு
வெயிலிலிருந்து தப்பிக்கச் சரியான வழிகள் எவை?
மத்திய அமைச்சரின் இந்தத் தகவல் பாரம்பரிய நம்பிக்கையைச் சார்ந்ததாக இருந்தாலும், தற்போதைய அதீத வெப்ப நிலையில் கீழ்க்கண்ட முறைகளே பாதுகாப்பானவை என மருத்துவர்கள் பரிந்துரைக்கின்றனர். அடிக்கடி தண்ணீர், இளநீர் அல்லது ஓ.ஆர்.எஸ் (ORS) கரைசலை அருந்தவும். தளர்வான, மெல்லிய பருத்தி ஆடைகளை அணியவும். நண்பகல் 12 மணி முதல் மாலை 4 மணி வரை வெளியே செல்வதைத் தவிர்க்கவும். தர்பூசணி, வெள்ளரிக்காய் போன்ற நீர்ச்சத்து மிக்க பழங்களைச் சாப்பிடவும்.