மன அழுத்தம் இனி ஓடிப் போகும்; மாத்திரைகளை விட உடற்பயிற்சிக்கு அதிக பவர்; ஆய்வில் வெளியான ஆச்சரிய தகவல்
செய்தி முன்னோட்டம்
உலக சுகாதார அமைப்பின் படி, உலகெங்கிலும் சுமார் 5.7 சதவீத பெரியவர்கள் மன அழுத்தத்தால் பாதிக்கப்பட்டுள்ளனர். இதற்கு வழக்கமாக மனநல சிகிச்சை மற்றும் மருந்துகள் பரிந்துரைக்கப்படுகின்றன. ஆனால், சமீபத்தில் காக்ரேன் என்ற அமைப்பு நடத்திய விரிவான ஆய்வில், மன அழுத்தத்தைக் குறைப்பதில் மருந்துகள் மற்றும் சிகிச்சைக்கு இணையாக உடற்பயிற்சியும் சிறந்த பலனைத் தருவது கண்டறியப்பட்டுள்ளது. சுமார் 5,000 பேரிடம் நடத்தப்பட்ட 73 சோதனைகளை ஆய்வு செய்த பிறகு விஞ்ஞானிகள் இந்த முடிவுக்கு வந்துள்ளனர்.
மாற்றங்கள்
மூளையில் ஏற்படும் மாற்றங்கள்
உடற்பயிற்சி செய்யும் போது நமது மூளையில் செரோடோனின், டோபமைன் மற்றும் எண்டோர்பின்கள் போன்ற வேதிப்பொருட்கள் சுரக்கின்றன. இவை இயற்கையாகவே நமது மனநிலையை மேம்படுத்தும் திறன் கொண்டவை. மன அழுத்தத்தினால் மூளையின் நெகிழ்வுத்தன்மை குறையும் போது, உடற்பயிற்சி அதை மீண்டும் தூண்டி மூளையை சுறுசுறுப்பாக்குகிறது. இது ஆண்டிடிரஸ்பிரஸன்ட் மருந்துகள் செய்யும் வேலையையே இயற்கையான முறையில் செய்கிறது என்று மருத்துவர்கள் விளக்குகின்றனர்.
உடற்பயிற்சி
என்ன மாதிரியான உடற்பயிற்சி சிறந்தது?
இந்த ஆய்வின்படி, மிகக் கடினமான உடற்பயிற்சிகளை விட, எளிய நடைப்பயிற்சி, யோகா அல்லது தை சி (Tai chi) போன்ற பயிற்சிகளே ஆரம்பக்கட்ட மன அழுத்தத்திற்குப் போதுமானவை. வாரத்திற்குச் சில முறை செய்யும் ஏரோபிக் பயிற்சிகள் மற்றும் தசைப்பயிற்சிகள் மன அழுத்தத்தின் அறிகுறிகளை 13 முதல் 36 நாட்களில் கணிசமாகக் குறைப்பதாகத் தெரியவந்துள்ளது. உங்களுக்குப் பிடித்தமான ஒரு விளையாட்டைத் தேர்ந்தெடுப்பதன் மூலம் மனதிற்கு மகிழ்ச்சியும் உடலுக்கு ஆரோக்கியமும் ஒரே நேரத்தில் கிடைக்கும்.
மாற்று
மருந்துக்கு மாற்றா?
உடற்பயிற்சி என்பது ஒரு சிறந்த சிகிச்சை முறை என்றாலும், மருந்துகளை மருத்துவரின் ஆலோசனையின்றி நிறுத்தக்கூடாது என்று ஆய்வாளர்கள் எச்சரிக்கின்றனர். சிலருக்கு மருந்துகள் மற்றும் சிகிச்சையோடு உடற்பயிற்சியையும் சேர்த்துப் பின்பற்றுவது மிக விரைவான முன்னேற்றத்தைத் தரும். குறிப்பாக, மன அழுத்தத்தில் இருப்பவர்கள் உடற்பயிற்சியைத் தொடங்கத் தயங்கலாம். அவர்களுக்கு ஆரம்பத்தில் எளிய நடைப்பயிற்சி ஒரு சிறந்தத் தொடக்கமாக அமையும். இது குறைந்த செலவில், எவ்விதப் பக்கவிளைவுகளும் இல்லாத ஒரு சிறந்த தீர்வாகும்.