வைரலாக பேசப்படும் மல்லிகார்ஜுன கார்கேவின் லூயி விட்டான் மப்ளர்
அதானி குழுமம் தொடர்பான ஹிண்டன்பர்க் அறிக்கையை விசாரிக்க நாடாளுமன்ற கூட்டுக் குழுவை(JPC) அமைக்க வேண்டும் என்று ராஜ்யசபா எதிர்க்கட்சித் தலைவர் மல்லிகார்ஜுன கார்கே நேற்று(பிப் 8) வலியுறுத்தினார். அவர் இதை கோரிய போது, மத்திய அமைச்சர் பியூஷ் கோயல், அந்த குழுவை அமைப்பதற்கு ஏதாவது உறுதியான அடிப்படை காரணம் இருக்க வேண்டும். இல்லையெனில் கார்கே ஜி அணிந்திருக்கும் விலையுயர்ந்த மப்ளருக்காக JPC அமைக்கப்பட வேண்டும் என்ற கோரிக்கையும் எழலாம் என்று கூறினார். குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீதான விவாதத்தின் போது, அவைத் தலைவர் மற்றும் ராஜ்யசபா எதிர்க்கட்சித் தலைவருக்கு இடையே இந்த உரையாடல் நடந்தது.
விலை உயர்ந்த லூயி விட்டான் மப்ளர் எங்கிருந்து வந்தது: பியூஷ் கோயல்
விவாதத்தில் பங்கேற்ற கார்கே, அதானி குழும விவகாரத்தில் JPCஐ உருவாக்க வேண்டும் என்ற கோரிக்கையை எழுப்பினார். இந்த கோரிக்கையின் போது அனுமதியுடன் தலையிட்ட கோயல், JPC கோரிக்கையை எழுப்புவதற்கு ஏதேனும் உறுதியான அடிப்படை காரணம் இருக்க வேண்டும் என்றார். "தனி நபர் பிரச்சனைகளுக்கு JPC அமைத்தால், நாளை கார்கே அணிந்திருக்கும் லூயி விட்டான் மப்ளர் எங்கிருந்து வந்தது, இவ்வளவு சொத்து எப்படி கிடைத்தது என்பதைப் பற்றி ஆராய JPC அமைக்க வேண்டும் என்று யாரவது கூறுவார்கள்" என்றார் கோயல். இந்த கருத்துக்களால் மல்லிகார்ஜுன கார்கேவின் லூயி விட்டான் மப்ளர் செய்தி தற்போது வைரலாகி கொண்டிருக்கிறது.
