மோடி 3.0 அமைச்சரவை: மக்களவை சபாநாயகர் யாராக இருக்கக்கூடும்?
செய்தி முன்னோட்டம்
மோடி தலைமையிலான அமைச்சரவை இலாக்காக்கள் நேற்று அதிகாரபூர்வமாக ஒதுக்கப்பட்டது.
அடுத்தகட்டமாக மக்களவை சபாநாயகரை தேர்ந்தெடுப்பதில் அனைவரின் கவனம் திரும்பியுள்ளது.
NDA கூட்டணியில் பாரதிய ஜனதா கட்சி (BJP) 272 இடங்கள் பெற்றுள்ளதால், கூட்டணி கட்சிகளின் ஆதரவை நம்பியே ஆட்சி அமைத்துள்ளது.
இதன் விளைவாக, சபாநாயகர் பதவிக்கு கூட்டணி கட்சிகள் குறி வைத்துள்ளதாக பேச்சு எழுந்துள்ளது.
குறிப்பாக, 28 லோக்சபா இடங்களைக் கொண்ட இரண்டு கிங்மேக்கர்களான சந்திரபாபு நாயுடுவின் தெலுங்கு தேசம் கட்சி (டிடிபி) மற்றும் நிதிஷ் குமாரின் ஐக்கிய ஜனதா தளம் (ஜேடி-யு) ஆகியவை அந்த முக்கிய பதவியை எதிர்பார்க்கின்றன என்று செய்திகள் வெளியாகியுள்ளன.
இருப்பினும், கூட்டணிக் கட்சிகளில் இருந்து மக்களவை சபாநாயகரை நியமிக்க பாஜக விரும்பவில்லை என்று வட்டாரங்கள் தெரிவிக்கின்றன.
எப்படி தேர்ந்தெடுக்கப்படுகிறார்?
மக்களவை சபாநாயகர் எப்படி தேர்ந்தெடுக்கப்படுகிறார்?
அரசியலமைப்பின் 93வது பிரிவின்படி, புதிய மக்களவை முதல் முறையாக கூடுவதற்கு முன்பு சபாநாயகர் பதவி காலியாகிறது.
புதிதாக தேர்ந்தெடுக்கப்பட்ட நாடாளுமன்ற உறுப்பினர்களுக்கு (எம்.பி.க்கள்) பதவிப் பிரமாணம் செய்து வைப்பதற்காக இடைக்கால சபாநாயகரை குடியரசுத் தலைவர் நியமிப்பார்.
இதைத் தொடர்ந்து, மக்களவை சபாநாயகர் தனிப்பெரும்பான்மையால் தேர்ந்தெடுக்கப்படுகிறார்.
அதாவது, மக்களவையின் சபாநாயகராக வருவதற்கு, அவையில் இருக்கும் உறுப்பினர்களில் பாதிக்கும் மேற்பட்டவர்கள் குறிப்பிட்ட வேட்பாளருக்கு வாக்களிக்க வேண்டும்.
சபாநாயகரை நியமிக்க எந்த அளவுகோலும் இல்லை. பாஜக தலைவர்களான சுமித்ரா மகாஜன் மற்றும் ஓம் பிர்லா இருவரும், முறையே கடந்த 2014-2019 மற்றும் 2019-2024 ஆண்டுகளில் மக்களவைகளில் சபாநாயகராக இருந்தனர்.
சபாநாயகரின் பங்கு
மக்களவை சபாநாயகரின் பங்கு?
மக்களவை சபாநாயகர் என்பது ஒரு முக்கியமான பதவியாகும். ஏனெனில் அவர் உத்தரவின் கீழ் தான் சபை நடக்கவேண்டும்.
சபையில் ஆளும் மற்றும் எதிர்க்கட்சி உறுப்பினர்கள் இருப்பதால், சபாநாயகர் என்பவர் கட்சி சார்பற்றவராக இருக்க வேண்டும்.
சபாநாயகரும் ஒரு குறிப்பிட்ட கட்சியை பிரதிநிதித்துவப்படுத்தும் மக்களவையில் தேர்ந்தெடுக்கப்பட்ட உறுப்பினராக இருப்பதால், இந்த பாத்திரம் இன்னும் முக்கியத்துவம் வாய்ந்ததாக கருதப்படுகிறது.
முன்னோடி
யார் பெயர்கள் அடிபடுகின்றன?
ஒரு சில ஊடக செய்திகள் படி, சபாநாயகர் பதவிக்கு டக்குபதி புரந்தேஸ்வரியின் பெயர்தான் அதிகம் யூகிக்கப்படுகிறது.
தெலுங்கு தேசம் கட்சி நிறுவனர் என்.டி.ராமராவின் மகளான, டக்குபதி புரந்தேஸ்வரி, ஆந்திராவை சேர்ந்த பாஜக அரசியல்வாதி மற்றும் மாநில கட்சியின் தலைவரும் ஆவார்.
புரந்தேஸ்வரி 2009இல் மனித வள மேம்பாட்டு அமைச்சகத்திலும், 2012இல் வர்த்தகம் மற்றும் தொழில்துறை அமைச்சகத்தின் இணை அமைச்சராகவும் பணியாற்றியுள்ளார்.
ஆந்திரப் பிரதேசத்தின் ராஜமுந்திரியில் இருந்து 2.3 லட்சம் வாக்குகள் வித்தியாசத்தில் புரந்தேஸ்வரி வெற்றி பெற்றார்.
லோக்சபா சபாநாயகராக அவர் பெயர் பரிந்துரைப்பு பட்டியலில் இருப்பதால், தற்போது அவர் மத்திய அமைச்சரவையில் சேர்க்கப்படவில்லை.
மேலும் அவர் சந்திரபாபு நாயுடுவின் மைத்துனி ஆவார்.
அதன்மூலம் அவரையும் சமாதானப்படுத்த முடியும் என பாஜக கணக்கு போடுகிறது.