நாடாளுமன்ற சிறப்பு கூட்டத்தொடர்: என்னென்ன எதிர்பார்க்கலாம்?
செய்தி முன்னோட்டம்
நாடாளுமன்றம் கூட்டத்தொடர் அண்மையில் நடந்துமுடிந்த நிலையில், தற்போது வரும் செப்டம்பர் 18ம் தேதி முதல் 22ம் தேதி வரை நாடாளுமன்ற சிறப்பு கூட்டத்தொடர் நடைபெறவுள்ளது என்று மத்திய அமைச்சர் பிரகலாத் ஜோஷி அறிவித்துள்ளார்.
மேலும், சுதந்திரமடைந்து 75 ஆண்டுகள் கொண்டாட்டக்காலத்தில் நடக்கும் இந்த கூட்டத்தில் முக்கிய ஆக்கபூர்வமான ஆலோசனைகள் மற்றும் பயனுள்ள முடிவுகளை மேற்கொள்ள நாடாளுமன்றம் காத்திருக்கிறது என்றும் அவர் குறிப்பிட்டு கூறியுள்ளார்.
இந்த கூட்டத்தொடரில் 5 அமர்வுகள் நடக்கும் என்று வெளியாகியுள்ள தகவல் இக்கூட்டத்தொடர் மீது மேலும் எதிர்பார்ப்பினை ஏற்படுத்தியுள்ளது.
இந்த சிறப்பு கூட்டமானது அண்மையில் பிரதமர் மோடியால் திறந்து வைக்கப்பட்ட புதிய நாடாளுமன்ற கட்டிடத்தில் நடக்கும் என்று கூறப்படுவதால், அக்கட்டிடத்தின் இறுதிக்கட்ட பணிகள் மும்முரமாக நடந்து வருகிறது என்றும் கூறப்படுகிறது.
கூட்டத்தொடர்
செப்டம்பர் 18ம் தேதி துவங்கி 22ம் தேதி வரை நடக்கவுள்ள சிறப்பு கூட்டத்தொடர்
இதனைத்தொடர்ந்து வரும் செப்டம்பர் 9, 10.,தேதிகளில் ஜி20 மாநாடு டெல்லியில் நடக்கவுள்ள நிலையில், செப்டம்பர் 18ம்தேதி துவங்கி 22ம்தேதி வரை நடக்கவுள்ள இக்கூட்டத்தொடரில் ஜி20 மாநாடு வெற்றிகரமாக நடத்தப்பட்டது குறித்தும் விவாதிக்கப்படும் என்று கூறப்படுகிறது.
தொடர்ந்து, புதிய நாடாளுமன்ற கட்டிடம் குறித்த சிறப்புகள் குறித்தும், 'சந்திரயான் 3' விண்கல வெற்றி குறித்தும் மத்திய அரசின் அடுத்த இலக்கு குறித்தும் இந்த கூட்டத்தொடரில் நிச்சயம் விவாதிக்கப்படும் என்று தெரிகிறது.
மேலும், வரும் 2024ம் ஆண்டு நாடாளுமன்ற தேர்தல் குறித்த முக்கிய மசோதாக்கள் நிறைவேற்ற வாய்ப்புள்ளது என்று கூறப்படும் நிலையில், இத்தேர்தல் முன்னதாக நடத்த முடிவுச்செய்யப்பட்டு அதற்கான அறிவிப்பினை வெளியிடும் நோக்கில் இக்கூட்டத்தொடர் அறிவிக்கப்பட்டுள்ளது என்ற பேச்சுக்களும் அரசியல் வட்டாரங்களில் உலா வந்து கொண்டிருக்கிறது குறிப்பிடத்தக்கது.