உத்தரகாண்ட் சுரங்கப்பாதை மீட்புப்பணி உபகரண கோளாறால் சற்று தோய்வு
செய்தி முன்னோட்டம்
உத்தரகாண்ட் சுரங்கபாதையில் 12 நாட்களுக்கும் மேலாக சிக்கியுள்ள தொழிலாளர்களை மீட்கும் பணி நேற்று இறுதிக்கட்டத்தை எட்டியுள்ள நிலையில், நேற்று காலையே அவர்கள் மீட்கப்படுவார்கள் என நாடே எதிர்பார்த்திருந்த நேரத்தில், இடிபாடுகளில் இருந்த இரும்பு கம்பி ஒன்று, மாற்று பாதை அமைக்கும் போது குறுக்கே இருந்ததால், அதனை வெட்டி எடுக்க தாமதமானது.
அதனை தொடர்ந்து, மீண்டும் வேகமெடுத்து மீட்பு பணி, நேற்று இரவு நிறைவடையும் என எதிர்பார்க்கப்பட்டது.
எனினும், மாற்றுப்பாதை தோண்டும் உபகரணம் பழுதடைந்ததால், மீண்டும் சுணக்கம் ஏற்பட்டுள்ளது.
இந்த உபகரண கோளாறை சரி செய்தபின்னர், இன்று காலை 11 மணி அளவில் மீட்பு பணிகள் மீண்டும் துவங்கும் என சம்பவ இடத்திலுள்ள அதிகாரிகள் தெரிவித்துள்ளனர்.
card 2
ஸ்ட்ரெட்சர்கள் மூலம் தொழிலாளர்களை வெளியே கொண்டுவர திட்டம்
தேசிய பேரிடர் மேலாண்மை ஆணையத்தின் (NDMA) உறுப்பினர் லெப்டினன்ட் ஜெனரல் (ஓய்வு) சையத் அட்டா ஹஸ்னைன் கருத்துப்படி, சிக்கியுள்ள தொழிலாளர்களை மீட்பதற்கான கிடைமட்ட துளையிடும் நடவடிக்கை, கூடுதல் தடைகளை சந்திக்கக்கூடும்.
அதனால், மீட்பு நடவடிக்கைக்கான காலக்கெடுவை கணிக்கமுடியாது என வலியுறுத்தினார்.
சிக்கிய ஒவ்வொரு தொழிலாளிக்கும் ஒன்று வீதம், 41 ஆம்புலன்ஸ்கள் சுரங்கப்பாதை தளத்தில் தயார்நிலையில் நிறுத்தப்பட்டுள்ளதாகவும், கடுமையாக காயமடைந்த தொழிலாளர்களை விமானத்தில் ஏற்றிச் செல்ல ஏற்பாடுகள் செய்யப்பட்டுள்ளதாகவும் திரு ஹஸ்னைன் மேலும் கூறினார்.
தொழிலாளர்களை, மாற்றுப்பாதையில் பொருத்தப்பட்டுள்ள குழாய் வழியாக, ஸ்ட்ரெச்சரில் வெளியே கொண்டு வர திட்டமிட்டுள்ளனர் மீட்பு குழுவினர்.